Cu vuelo 765 di KLM, diadomingo e prome grupo di studiante Arubano cu lo sigui un estudio avansa na nivel HBO of Universiad na Hulanda. Un total di 24 studiante a yega y lo bai studia na e ciudadnan di Tilburg y Eindhoven. Diaranson 2 di augustus e di dos grupo y tambe esun mas grandi lo bin Hulanda.
Mescos tur aña, Minister Plenipotenciario mr. Ady Thijsen hunto cu directora a.i. di Arubahuis, drs. Glenda Hernandez, a ricibi e studiantenan. Un biaha mas tabata tin un delegacion consistiendo di functionarionan di Departamento di Enseñansa di Arubahuis, studiementor-y miembronan di e POC (Plaatselijke Opvangcommissie) presente den sala di yegada di Schiphol.
Mester bisa cu e grupo di studiante a sali basta lihe cu nan maleta. Akinan na un forma bon coordina y organisa a haya instruccion di personal di Arubahuis, mentor- y miembronan di e POC con pa cana y unda nan mester a para den grupo pa warda nan turno pa bay na e bus cu lo hiba nan Tilburg of Eindhoven.
Na Schiphol tabata tin un camaraman di e programa Leu foi Cas pa graba e yegada y haci algun entrevista cu e studiantenan. Roy Kelly di e website Arubiano.eu tambe a saca potret di e studiantenan.
Dialuna e grupo di studiantenan aki lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.
E prome aña e studiante ta ricibi guia di e studiementor, pero pa e resto di su estudio e ta cay bou di Arubahuis.
