Ta calcula cu mas di 1200 persona a atende e evento “To the Moon – Summer Bursalen” cu a tima luga diabierna anochi den Renaissance Convention Center. Tabata un evento organisa pa HotShotz.
Edson Tromp Jr. a bin te for di Hulanda pa duna un man den e organisacion y supervision di e evento completo. Manera ta conoci, separa di ta un DJ exitoso, Edson Tromp Jr. a studia “Event Managment” na ROC van Amsterdam y ta trahando awendia eynan, brindando guia na studiantenan den e ramo aki.
E mes a yuda organisa varios evento grandi na Hulanda, a gana hopi experiencia y awendia ta uzando esakinan den su propio eventonan.
Pa animacion y presentacion, a invita varios DJ local, manera Nutzbeatz, Jaystax, Devin, Digital Paradise, Bigreckless y sin lubida Phattunez. E variacion di musica presenta a sa di entretene e publico grandi presente.
E fiesta a sirbi tambe pa despedi di e bursalennan cu ta sali den e dianan aki pa Hulanda. Nan a haya un bon chens pa topa otro y disfruta pa e ultimo weekend na Aruba, prome cu nan start nan estudio y bida nobo na Hulanda.
Ta intencion pa organisa un evento similar di Hotshotz otro luna atrobe, pero e biaha aki na Hulanda.
