Prome edicion di Island Fest tabata fabuloso

Island Festival (IF) ta un concepto innovativo cu ta bin for di Ministerio di Turismo, conhuntamente cu e board di ATA, cu a habri su portanan for di comienso. Cu mannan habri a habri a acepta e proyecto aki, a kere den e board di Island Festival y esaki ta e resultado.

Miriam Illidge, PR di Island Fest Aruba a comenta di ta gradici e confiansa cu a deposita den e board di IF, pa brinda un anochi asina aki.

 

San Nicolas

Illidge a splica cu e iniciativa aki ta di minister Dangui Oduber. E intencion ta pa motiva e trafico di turismo pa San Nicolas. Pasobra San Nicolas, tin hopi pa ofrece y esaki ta no solamente saca nos localnan for di nan districto y pasa gezellig na San Nicolas, pero tambe turista, pa laga nan sa cu San Nicolas tin hopi pa ofrece.

 

Cuanto a dura y con

Illidge a comenta cu diaranson anochi tabata e gran inicio. E intencion ta pa tuma luga tur ultimo diaranson di luna, cual lo tuma luga den curazon di San Nicolas. E intencion ta pa transcurso di otro aña agrega mas districto. Lo keda mantene tur fin di luna ultimo diaranson na San Nicolas. Pero ta bay agrega por ehempel districto di Santa Cruz, di Noord, Playa. Ta bay rotate entre e districtonan aki. E intencion ta pa e bira algo hopi grandi.

Standnan di cuminda

Tin varios stand cu ta ofrece nan tipo di cuminda. Tin por ehempel stand local, ta haya cuminda tipico di Aruba. Nan ta bende awa di Playa, y tambe Pisca.

Den stand multicultural, tin cuminda di Jamaica, tin cuminda di Surinam. Tin diferente cuminda pa gusto di tur persona. Si mira con e anochi a bay, ta obvio cu tin cu bay expande, segun Illidge, pasobra tin rijnan largo di hende cu a bin cu hopi gana di purba e dushi cumindanan. A premira caba cu ta bay expande.

 

Siguiente IF

E siguiente Island Fest lo ta e ultimo diaranson di luna un biaha mas, na San Nicolas. Naturalmente invitacion ta bay pa tur hende pa no falta e proximo Island Fest. Illidge kier a gradici tur hende cu a sali pa sostene e evento aki. Esaki ta un prueba cu nos Arubianonan kier algo, kier socialisa, kier sali for di nan cas. Come algo dushi. Pa esnan cu pa un of otro motibo no por tabata tey presente, no faya e otro edicion di Island Fest, pasobra e no lo bay ta nada diferente. E lo ta grandi, cu cuminda, e vendornan cu arts & craft, cu e shownan historico, e produccion great di Elite Production. Nan a presenta algo hopi bunita e anochi aki por cierto. Ta spera cu e lo bay sigui di ta algo hopi great pa pueblo di Aruba.