Diabierna merdia a tuma luga un conferencia di prensa na DOW, esaki den cuadro di un publicacion cu a sali a base di un veredicto di hues. Segun abogado David Kock, ta kere cu tabata bon pa duna un relato extenso di loke hues a dicta.
Tabata un veredicto cu mester a bin diaranson, pero hues a dicta awe mes. Por a tuma nota cu den medionan a sali cu corte a prohibi proyecto di incinerator na dump.
Esey no ta un refleho corecto di loke ta skirbi den e veredicto. Segun Kock, e demandante a demanda un lista largo di punto cu a pidi pa condena pais Aruba den dje.
A pidi entre otro cu dump mester wordo cera y esey a wordo rechasa pa Corte explicitamente.
A pidi tambe cu e incinerator no mester bin eynan. Esey hues no a prohibi absolutamente. Loke si hues a bisa ta cu un incinerator ta cay bao di e lista di empresanan of actividadnan cu nos ley di molester (hindervergunning), ta bisa cu mester tin un permiso p’e pa por oper’e.
Corte a bisa locual ta para den ley cu no por opera un incinerator tanten cu bo no tin un hindervergunning. Awo e disputa of e punto cu no tabata tin totalmente di acuerdo cu ne, tabata cu land a indica cu mester a haci poco test cu e incinerator, door cu Land ta cumprando e incinerator di un empresa, mester sa cu e empresa a deliver e incinerator manera cu mester ta y cu e incinerator ta cumpli cu e regulacion.
Esey tabata un cuestion di interpretacion. Hues den esey si tabata cla y a bisa cu tampoco mas testmento di incinerator mientras cu e hindervergunning no ta cla. Land no tin ningun problema cu esey. Land tambe a pidi e hindervergunning. Esey awo ta den tratamento y mester bin un decision riba dje.
Durante cu hues a bishita e instalacion di incinerator y tambe wak loke tabata sosodiendo riba dump, land a indica cu e idea no tabata pa den e poco dianan di aña cu biento sa bolter, pa ora e biento no ta e ruta normal di tera pa lama, sino cambia bin di lama pa tera, na e momento ey e incinerator no mester opera.
P’esey hues tambe ta bisa den su veredicto, cu ta p’esey tambe e ta bay tene Land na e toezegging ey, cu land a haci y ta bis’e cu Land no lo mag di opera e incinerator ora cu e biento ta draai.
Mescos ta aplica pa candela riba dump. A bisa pa percura pa no tin candela riba dump, ora cu e biento bira. Hasta den esey a haci un diferencia. El a bisa cu ta bay tin casonan di candela di Serlimar of un otro instancia autorisa riba dump y ta bay tin candelanan tambe cu ta cuminsa espontaneamente of hendenan cu ta subi piki sushi riba dump sin autorisacion y ta pega candela pa saca koper di wayanan of loke sea.
Esey hues a bisa cu no por exigi di Land pa prohibi’e, pero land mester haci su best pa purba di paga e candelanan eynan.
Hues tambe claramente a indica cu e sistema di procesa e sushi y pon’e na Sero Tijshi y der’e, ta un adelanto grandisimo riba e sistema cu tabata tin prome, cu hasta den esey Land tambe ta actua corecto.
Peticionnan tambe pa paga pa e famia mester muda di e luga, tambe a keda rechasa. E boet cu Land lo mester paga si e ta opera e incinerator sin hindervergunning of ta oper’e ora biento ta draai, e boet ey si Land mester paga, pero na Rode Kruis, no na e persona mes en cuestion.
Si evalua tur esaki, segun Abogado Kock, e conclusion hustamente no ta cu a para e proyecto, sino simplemente ta en espera di e Hindervergunning. Lo opera e incinerator conforme ley y Land sigur por biba cu esaki.
Tambe naturalmente Land no lo kier pa nan inicia candelanan riba dump, si e biento tambe ta bay direccion di e casnan y no direccion normal.
En principio Land por compronde di corte y en espera di e Hindervergunning, lo djis sigui encamina e proyecto aki.
