Minister di Cultura ta informa cu dia 1 di januari 2021 a conmemora cu 35 aña pasa Aruba a haya su Status Aparte denter di Reino Hulandes. Minister Maduro ta yama Aruba pabien cu 35 aña di nos Status Aparte y ta yama danki na tur hende cu ta contribui na e desaroyo positivo di nos Pais. E mandatario ta enfatisa cu ta importante pa nos ta bon informa y sa historia di nos Pais. Pa e motibo ey lo pasa un programa informativo na canalnan di television pa asina pueblo di Aruba ta bon informa tocante historia di Status Aparte di nos Pais.
E programa informativo ’35 aña di Status Aparte – Un lucha cu a marca historia’ lo tin como invitado, ex Prome Minister, Nelson Oduber, un persona cu a experiencia e lucha di Status Aparte hunto cu Nos Libertador Betico Croes den feliz memoria. Durante di e programa Oduber lo brinda informacion riba diferente componente importante di e lucha di Status Aparte y lo haci referencia na desaroyonan importante di Status Aparte, kico esaki a nifica pa Aruba den pasado, presente y den futuro. Giovanni Muller lo presenta e programa.
Lo transmiti e programa ’35 aña di Status Aparte – Un lucha cu a marca historia’ na TeleAruba, Canal 22 y Diario TV durante 5 minuut prome cu e programa di Noticia entrante diahuebs dia 14 di januari 2021 y lo termina diahuebs dia 21 di januari 2021.
