Partido AVP a cana un caminda di envolvimento historico den nos comunidad pa yega na
su Programa di Partido y mañan ta yega na un bunita punto di culminacion na momento cu e programa ta wordo presenta den un Conferencia di Prensa habri pa publico.
Aki a invita, na prome luga, tur cu a participa den 1000Voz pa ta presente ya cu e programa ta e producto di consulta intensivo cu nos comunidad. “Nos a haya un aporte hopi grandi di tur skina di nos pais, di hoben, di grandi, di adulto, di profesional, di esnan cu ta biba e bida diario cu tur su retonan, complicacion y exitonan y nos a compila e sentimentonan ey hunto cu esnan cu a recoge tambe for di institucionnan oficial di nos pais manera sindicatonan y gremionan comercial durante e periodonan di Dialogo Social y Town Hall Meeting,” asina Mike Eman a splica For di tur e participantenan a bin sali afo cu Aruba a yega na un nivel di desaroyo cu ta haci’e ideal pa inicia un siguiente etapa di progreso. E enfoke ta cu padilanti mester sigui bay y no bay bek atras unda tabatin falta atencion pa esnan di menos recurso, pa e necesidadnan den bario, deterioro di scol, pa sostene un entrada reparti mas husto den nos pais y falta di perspectiva di e infrastructura di nos pais. “Nos a pone tur e base ey awe caminda despues di 8 aña bo ta mir’e unda cu bo cana y den e forma con nos ta organisa y atende cu seriedad temanan manera reforma di pensioen, reforma di cuido medico, reforma di tur e institutonan cu tabata tambalea na momento cu nos a drenta gobernacion na 2009 pero cu awe ta solido. Nos sistema di seguro medico ta solido, nos sistema di AOV ta solido, pensioen di APFA tambe ta solido pa motibo di e reformanan cu nos haci.” Ningun partido politico a prepara su programa di gobernacion den un forma asina di consulta. For di prome momento gobierno di AVP a introduci Dialogo Social unda a recoge sentimento di hopi organisacion comercial y social di nos pais.
Tambe a haci Town Hall Meetings tur rond di Aruba y mas recientemente reunionnan di contacto y reunionnan oficial cu diferente organisacion den nos comunidad. Presentacion di Programa di Partido ‘Padilanti: 2017-2021’ ta tuma luga diamars for di 6’or di atardi den Renaissance Conference Center den forma di un Conferencia di Prensa cu ta habri pa publico tambe. Despues di esey, e programa lo ta obtenibel tambe den formato digital atrabes di tur e portalnan di media social di e partido y su candidatonan, pero tambe imprimi e ta obtenibel na Cas di Partido AVP rond di Aruba.
