E preso Eric Lindeborg di 35 aña di edad awe a gosa di un “libertad” di un rato…solamente 41 minuut. Tabata pa 2:47pm cu a haya su falta den KIA y despues di apenas 41 minuut, esta pa 3:28pm, e patruya di Polis K-9 a informa cu el a detene e preso na altura di Yuwana Morto Complex. E ekipo di 24ora.com tabata hunto cu Polis den e accion aki y tabata #PromeDenNoticia na e sitio di incidente.
Eric Lindeborg tin algun tempo caba cera. E hunto cu su tata, un amigo di su tata y e pareha di e amigo di su tata a bay purba pasa 12 kilo di cocaina via Aruba pa Hulanda den avion. Pero Duaneronan atento na Aeropuerto a descubri e cuarteto aki y a detene nan pareu. A haya cada un cu mas o menos 3 kilo di cocaina pega na nan curpa, cla pa subi avion pa tera frieu. A detene nan y na Corte, Eric a haya un castigo di 42 luna di prizon kitando 6 luna condicional, pues mester sinta un total di 3 aña largo, descontando e tempo di “bon conducta”.
For di Instituto Coreccional Aruba (KIA) nos a compronde cu nan tin bastante dolor di cabes cu e preso aki. Pasobra despues cu e mester a bin sinta su castigo, a bira conoci cu su tata tabata “Detentie ongeschikt” pa motibo di enfermedad y nan a lag’e bay bek Hulanda. E yiu a keda cera su so na Aruba, e no tin famia aki. Ta for di Hulanda nan a bin Aruba pa busca droga y bay bek. E ta haya falta di su famia y ta rebeldia constantemente den prizon.
No mas cu algun siman pasa el a pega su corchon na candela den su cel. Consecuentemente a laga cer’e algun dia den cashot. Pero e ta bou supervision constantemente pa su comportacion y movecionnan straño den prizon. Awe a probecha un rato durante e tempo pa “lucht” pa scapa. Ainda no ta conoci con el a haci esaki, sea ta su so of cu ayudo di paden of ayudo di pafo. Ta bisto cu e no conoce e area y a keda mucho rato den vecindario directo di prizon, te cu nan a gar’e.
Durante un entrevista exclusivo cu 24ora.com na e sitio, el a bisa cu nan ta trat’e malo den prizon y cu KIA parce un “dierentuin’. Ta bisto cu e no ta na su agrado den prizon, cu de facto no ta un hotel sino un instituto pa corigi un comportacion robes den comunidad.
