Diahuebs 12 di December studiantenan di programa Organization, Governance and Management (OGM) ta cumpli cu nan tarea final y ta tene un presentacion di nan experiencia na Washington DC. Den luna di October un grupo di studiante di Universidad di Aruba di e programa OGM a bishita Washington DC.
Esaki tabata un biahe educativo cu e Facultad di Arte y Ciencia ta haci cada pasa 1 aña. E biahe tabata tin un duracion di 1 siman. E studiantenan a bishita diferente monumentonan y lugarnan conoci. Un di e organisacionnan cu a bishita tabata e “Organization of American States” (OAS). E meta di OAS ta pa fortalece paz y seguridad den e asina yama Western Hemisphere. E 4 pilarnan di e organisacion regonial aki ta democracia, derecho humano, seguridad y desaroyo. Sra Jennifer Molina, un Arubiano biba na Washington, a duna e studiantenan amplio splicacion di e obhetivonan di OAS y e la duna un recorido di e organisacion.
E museo “Newseum” tabata un di e otro lugarnan famoso cu e delegacion a bishita. Sr. Michael Freedman, un docente na George Washington University, a papia tocante e importancia di periodismo pa democracia y esaki tabata un lectura hopi informative y inspirativo pa e studiantenan. Desafortunadamente despues di 11 aña na e sitio actual, e Newseum lo sera su portanan. Durante e recorido den e museo di periodismo aki por a mira cierto monumento nan historico manera un parti di e “ Berlin wall” y tambe un seccion dedica na e atakenan di 9/11.
Un otro lugar cu studiante nan a bishita tabata e edificio di corte supremo di Estados Unidos. E corte supremo ta e corte mas halto na Estados Unidos. E tin un rol hopi importante y independiente banda di e poder legislativo y e poder ehecutivo. Studiante nan a drenta y sinta den sala di corte unda nan a haya un charla tocante con corte ta atende casonan pendiente. Diferente articulo den media ya a duna atencion na e biaha educativo aki y por bisa cu e biaha aki ta inspira y motiva studiantenan pa nan logra nan metanan pa bira un mihor profesional den futuro.
Diahuebs awo 12 di December tin un presentacion na Universidad di Aruba pa tur esnan cu a colabora, sponsor, cumpra rifa y a haci e biahe estudiantil uno exitoso. E presentacion ta di 7.00 pa 8.30 or di anochi den local A na Universidad di Aruba. Ta invita sponsors, famia y amigo pa bin tende con e studiantenan a experiencia e bishita na Washington DC y con esaki ta contribui na e desaroyo di e studiantenan di OGM.
