“E no ta nada nobo, pero e ta un tendencia creciente si. E aña aki berdad ta mirando un aumento drastico”, asina un dirigente di un di e 26 ekiponan di futbol afilia na Arubaanse Voetbal Bond (AVB) a duna nos di conoce. Esaki despues di a tuma nota di un cantidad di retiro cayendo entre hungadonan di ekiponan di futbol division di honor. Aña pasa AVB a conta no menos di 183 carta di retiro cu a drenta di hungadonan cu kier bay di un ekipo pa e otro. E aña aki, apenas na mita di aña, ya caba e cantidad a surpasa 100, siendo cu ainda e fecha final pa manda retiro aden no a yega.

Tur aña despues di cada campeonato, e hungadonan ta liber pa entrega nan retiro y cambia di ekipo. Ultimo decada e tendencia aki a lanta cabes pisa. E motibo ta cu a cuminsa “cumpra” e hungadonan, sea cu placa of cu auto, brommer, etc. Un di e ekiponan pionero di e tendencia aki tabata SV Riverplate den añanan 90, bou maneho di Karel Arends. Aki a logra haya hopi hungado, local y internacional pa reenforsa e team di Madiki/Playa Pabou.

Despues di tempo SV Britannia tambe a logra haya hopi hungado basa riba e formula aki. Tin otro ekipo, manera Deportivo Nacional cu tambe por a duna hungadonan un opcion di trabou si nan hunga pa nan team. Aña pasa SV Dakota a bira un ekipo popular pa e mesun practica aki. Aunke na Aruba futbol ta un hobby y mayoria no ta mir’e como nan trabou di cada dia, toch e beneficionan ta yuda hungadonan den nan gastonan mensual. Tin ta haya 500 florin pa luna, otro ta haya un auto segunda mano, paga apartament pa nan, haya trabou pa nan y hasta otro ta pidi brommer of waverunner!

Dirigentenan cu mas experencia a conta nos cu e tendencia aki no ta pagando e aña aki pasobra e ekiponan no ta sinta riba tanto placa manera antes. Pa haya sponsor tur aña ta mas dificil y esey ta refleha tambe den e hungadonan cu cada ekipo por “afford”. Locual e hungadonan ta haci ta manda nan carta di retiro aden y despues ta bay “shop around”. Mayoria dirigente di ekipo ta mira esaki como un tendencia normal y a custuma cune caba. “Nan ta bin bek, vooral awo cu no tin placa pa duna”, asina un di e Managernan di un di e ekiponan grandi na Aruba a vocifera na nos. “Ta tur aña ta mesun cos. Nan ta sali pecho gerijs bay check kico tin y ta bin bek cabes abou pa sigui hunga cu e mesun team cu nan kier a bay laga”.

E realidad ta cu no ta tur hungado tin e status pa pidi tipo di areglonan asina. E nivel futbolistico y calidad di hungado, ta pone cu un hungado por exigi di nan ekipo. Lamentablemente hopi ekipo a inverti añas y tempo na nan formacion futbolistico di e hungadonan aki, for di mucha chikito te awo cu nan ta grandi, pa awo nan bira y “double cross” nan team.

Di otro banda, ainda e “deadline” pa entrega retiro di e ekiponan di futbol no a yega. Tur hungado tin te diadomingo dia 25 di augustus pa entrega nan carta di retiro na AVB. Ta pronostica cu e aña aki e cantidad di retironan lo surpasa aña pasa, si mira e tendencia di cartanan drentando tur dia. Por lo menos un solo ekipo a haya 13 carta y otro 9 carta di retiro caba mientras cu otronan ta coriendo cu e mesun tipo di suerte.

Un otro reallidad ta cu ora di retiro, e ekipo unda e hungado ta drenta, mester paga e ekipo unda e hungado a sali, un suma di minimo mil florin. Pues ora papia di bay cu algun hungado, mester realisa cu e ekipo tambe ta core un gasto halto. Pues separa di paga e hungado, mester paga e team tambe!

“Pero no ta pasobra e hungado a pidi retiro kiermen e ta bay. E ta mas bien pone su mes riba mercado como disponibel pa ekiponan evalua pa tuma nan. Pero si considera cu tin 26 ekipo total y 10 ekipo grandi cu ta yega final, anto ta con por tuma tur e 183 hungadonan cu a pidi retiro aña pasa? Pues hopi carta ta sali pero mayoria ta keda den nan team na final, e ta djis un wega”, asina Presidente di un di e ekiponan di futbol mas conoci di nos isla a sigura.

Comments

comments