Diamars atardi, mientras cu solo keto bay ta cayente ainda, a pidi polis pa presenta na Granaatappelstraat na Dakota. A drenta informacion cu tin un homber drumi bao di un auto.
E no kier sali pa asina e doño por bay traha. Ora cu polis a yega na e sitio, a resulta cu ta e conocido Preke, tabata drumi parcialmente bao di e auto. Tras di su lomba, su boter di Night Train long neck, casi full yen. Polis a dicidi mesora di sak’e for di bao di e auto, pon’e cant’i muraya y pidi presencia di Dogcatcher pa transporte pa Buena Vista. Eynan ta caminda cu e ta biba.
Preke diariamente ta druk cu bebemento durante dia y ta tene polis su man basta ocupa cu su transporte pasobra aki aya, riba caya, e ta keda benta pata pata burachi. Ta carga tin cu carg’e pa hink’e den Dogcatcher. Hasta ora e yega su cas, bah’e tambe, lag’e eynan pa ora e bin bek na tino, e por bay paden.
Te ainda no a mira ningun hende cu a mustra interes pa yuda Preke cu su problema social cu bebemento, etc. Un tiki bebida cu e bebe, ya caba e ta pata pata. Y casi e no por move.Esaki ta un biaha mas. Practicamente tur dia tin problema cu Preke.
