Ta obvio cu e pasenshi di Minister Dangui Oduber cu e CEO di Aruba Airport Authority, Joost Meijs, a caba. E representante di Schiphol Group tin solamente dos aña den funcion. Pero e cantidad di ‘blundernan’ cometi, entodo caso den wowonan di gobierno, ta pone cu awor ta momento pa cuminsa pensa den nombra un director local. Pasobra e director aki for di Hulanda a tuma decisionnan robes, a kita pan di Rubianonan, a duna un pronostico irealistico pa hustifica su decision y awo ata nos cu e realidad presenta riba mesa.
Minister Dangui Oduber a expresa su mes awe cu un tono super fada, disgusta y hasta desiluciona, pa cu e maneho cuestionabel di Joost Meijs na aeropuerto. El a kita 75 hende for di trabou, paga nan hunto un suma di 13 miyon florin pa nan bay y awo ta yenando tur e vacaturanan bek. Solamente cu e biaha aki ta empleando hende pa loco sin sigui e protocolnan di recurso humano. Riba dje, el a duna gobierno conseho robes, bisando cu aeropuerto lo recupera e cantidad di pasaheronan te na 2025, siendo cu aña pasa caba a casi yega e nivel di 2019, pues un otro ‘blunder’.
Bisando esaki, Minister Dangui Oduber ta cla pa pidi Schiphol Group pa sinta na mesa y evalua e contract. Tambe pasobra nan ta interesa pa tuma e aeropuerto di Boneiro y Corsou over, siendo cu den e contract cu Gobierno di Aruba ta stipula cu nan no por maneha ningun aeropuerto den nos region cu por forma un competencia pa nos isla. Y esaki, aunke nan ta islanan ruman…nan ta un competencia pa nos y Aruba lo no por keda cu su mannan crusa pa mira con Schiphol Group ta move pasaheronan di Aruba pa comparti cu e otro islanan! Pa mas informacion, lesa e edicion di TREMPAN di mañan.
