Desde awe mainta laat a hisa e medidanan di siguridad rond di ward’i polisnan tur rond di nos isla. Sigur na esun di Santa Cruz y esun na San Nicolas a nota baricadanan rond di e edificio, pa evita cu auto por pasa eydilanti. Polis a confirma cu un ke otro tin di haber cu menasanan cu a sali riba rednan social ultimo dianan durante manifestacionnan. Polis kier ta sigur di ta riba alerta pa cualkier tipo di atentado contra nan hendenan of edificionan.
No ta conoci si e alerta tin di haber cu e mesun menasa cu tin riba Minister Presidente mr. Evelyn Wever-Croes, cu ta hayando proteccion na trabou y na cas durante 24 ora pa dia. Hasta polisnan di VIP-Team ta stuur pa e prome mandatario y cu auto coriendo su dilanti y su tras pa brind’e mas proteccion posibel. Hecho ta cu como Minister Presidente e no mester ni entrega keho, pasobra autoridadnan semper mester garantisa su proteccion den ehecucion di su funcion.
Parce cu e menasa lo ta bini for di direccion di Richi Danies, sea directamente of indirectamente. No ta bisando si e menasa lo tin di haber cu sendemento di candela, spuit muraya cu graffitti of si ta algo mas serio cu lo inclui uzo di arma. Entodo caso, pa e fin di siman aki, polis ta riba alerta pisa y lo no bacila pa defende nan mes!
