Na inicio di e siman aki 24ora.com a publica e noticia di un coronavirus nobo cu ta manifesta su mes na China. Aunke e pais Asiatico aki ta keda leu di e area Caribense, mester sigui e desaroyo di cerca pa motibo cu ta miyones di Chines of otro ciudadanonan Asiatico ta biaha tur dia rond mundo.
Aworaki ta caba autoridadnan di Colombia a anuncia diaranson cu nan ta tumando accion contra loke por ta e prome caso di coronavirus di Wuhan, detecta den e pais.
“Un ciudadano di nacionalidad Chines di 19 aña di edad, a wordo traslada na un centro hospitalario di e ciudad di Bogota, cu e fin di descarta un posibel caso di Coronavirus,” e comunicado di Migracion Colombia ta bisa.
Ta trata di un stranhero cu a yega Colombia for di Instanbul, Turkia y kende na su yegada a bisa cu a presenta sintomanan di griep desde algun dia pasa.
“Di inmediato y teniendo cuenta cu e sintomanan di Coronavirus ta similar na un verkoud comun; dificultad pa hala rosea, keintura, tosamento y dolor muscular, e Oficial di Migracion a pone salubridad aeroportuario na altura, cu mesora a pone den practica e protocolnan di atencion corespondiente,” Migracion a añadi.
Na Latinoamerica te na e momentonan aki solamente a reporta otro posibel caso, na Mexico. A hiba e pashent na un centro di atencion y e ta den observacion.
E otro pasaheronan di e vuelo, cu tabata bayendo Panama, “a wordo desembarca den un zona special di e Aeropuerto Internacional El Dorado, pa wordo evalua, mientras ta realisa e proceso di desinfeccion di e avion.”
Ademas, Migracion Colombia a informa cu nan a traslada dos funcionario cu a atende e caso pa “un centro asistencial cu e meta pa samina nan.”
