Diasabra awor, dia 25 di januari, entre 11’or di mainta pa 3’or di merdia, publico en general ta bon bini pa bin celebra nos herencia cultural na Museo Arqueologico Nacional Aruba (MANA).
Salanan di exposicion lo ta habri gratis pa pueblo di Aruba. Alabes MANA ta ofrece actividad unda bishitantenan por siña di e expertonan, den e caso di MANA nos arkeologonan Arubiano. Arkeologo drs. Harold Kelly lo duna dos guia den e sala di exposicion permanente y arkeologo drs. Raymundo Dijkhoff lo splica dos biaha di artefactonan arkeologico na oranan stipula.
Pa sigura bo cupo pa cada actividad, yama MANA na 582-8979 pa registracion. Cupo ta limita, pues yama awor di biaha. Alabes MANA ta ofrece un dushi actividad di obra di man pa nos muchanan. Ta traha entre 12’or pa 2’or di merdia un bunita mascara cu ta basa riba un amuleto Indjan cu por mira den sala di exposicion. Fundacion 1403 lo ta presente na MANA pa bende e ultimo publicacion cientifico “The Archaeology of Aruba: The Pictographs and Petroglyphs”.
Co-autor di e publicacion aki, arkeologo drs. Harold Kelly, lo enfoca tambe riba e dibuhonan riba baranca durante su guia den sala di exposicion permanente. Separa drs. Raymundo Dijkhoff lo amplia riba artefactonan en conexion cu e exposicion temporario internacional Caribbean Ties. Pues si bo no a bishita e exposicion temporario interactivo aki ainda, ata bo oportunidad pa siña di e cultura indigena di region Caribense. Bini uno, bini tur. Nos ta wardabo Dia di Betico na Museo Arqueologico Nacional Aruba.
