Polisnan a reeligi Jose Dirksz como Presidente di nan sindicato

Sindicato di Polis Aruba (SPA) tabatin nan eleccion di directiva ayera. Desde mainta trempan miembronan por a vota na tur Warda di Polis. E directiva ta satisfecho cu e resultado di cual 256 polis a haci uzo di nan voto. E miembronan di sindicato a reeligi Jose Dirksz como Presidente di SPA, cu 147 voto riba su nomber. Claro mas cu e dos otro Polisnan cu tambe a postula nan mes pa encabesa e sindicato.

Polisnan a reeligi Jose Dirksz como Presidente di nan sindicato.

Polisnan a reeligi Jose Dirksz como Presidente di nan sindicato. Click link pa mas https://24ora.tv/2XCD4uo

Posted by 24ora on Friday, May 29, 2020

E dos otro candidatonan pa Presidente, esta Clyde Burke y Angelo Davelaar tin bastante tempo for di trabou, sea pa motibo di enfermedad cronico y e otro suspendi pa un investigacion interno den su contra.

Contrario na e otro añanan, e biaha aki hopi Polis miembro di e sindicato a vota. Den pasado ta un grupo masha limita ta participa na eleccion y hasta ma reunionnan di e sindicato. Por nota cu ultimo tempo esey ta cambiando y e miembronan nobo ta hopi mas activo y ta demanda mas sosten di SPA den nan lucha pa bienestar personal pero tambe pa asuntonan di trabou.

E campaña pa directiva nobo a inclui caranan nobo y fresco den e directiva y practicamente e Polisnan a scoge e team aki, segun Jose Dirksz, e Presidente reeligi di SPA. E directiva nobo ta consisti di Gilberto Lugas como Secretario, Juni Tromp como Tesorero, Rodney Solognier como Vice-presidente, Francel Benares, Rolando Maduro y Alexander Solarte como e Comisarionan. Aunke cu ainda falta 2 Comisario mas den e sindicato.

Segun Dirksz, e directiva tin un reto ta grandi. Esaki ta bin pasobra gobierno a corta den nan salario y a haci esey sin consulta cu e sindicato. Ainda nan ta sinta na mesa y e miembronan ta rabia p’esey. E ta un guera cu nan ta bay sigui cu ne.

Tin diferente meta ainda cu nan kier logra, entre otro baha e edad di pensioen. El a sigui bisa cu mundialmente Polis y Controladonan do Trafico Aereo ta baha cu pensioen prome cu esunnan cu ta traha den otro funcionnan den Gobierno. Aruba no mester ta un excepcion tampoco, mirando tur stress y emocion cu nan ta pasa den henter nan carera. Tin hopi cos mas pa bay p’e.

E directiva nobo tin yen animo y e Presidente ta sigur cu nan ta bay logra na caminda. Nan ta satisfecho cu e cantidad di hende cu a bay vota. Dirksz no a spera asina hopi, di cual mayoria hende a vota den oranan di mainta. E interes t’ey y ta mustra cu e miembronan tin confiansa den nan.