Na e momentonan aki Aruba ta bibando temponan dificil y pa e motibo ey un grupo di comerciante a manda un carta pa gobierno pidiendo pa nan cuminsa actua lihe pa asina salba comercio di Oranjestad. Hopi negoshi a cera y mas lo sigui haci esey. E retonan di Caya Grandi ta hopi grandi y no ta di awo comerciantenan ta batiendo alarma p’e situacion aki.
John Chemaly jr, di Mango, a splica cu e negoshinan den Caya Grandi ta pidiendo pa añanan caba pa bin cu cambionnan significante, pero no ta haya reaccion. Consecuentemente nan no por warda riba accion y ta spera cu e carta manda lo trece e cambionan necesario.
Chemaly a splica cu den caso di MANGO, nan a probecha pa haci algun cos ora cu nan a cera den cuadro di e crisis di COVID-19. Poco-poco ta ahustando na e normal nobo. Di basta tempo mester a bin cambio den tienda especialmente ora cu bin cu proceduranan nobo pa por cumpli cu e condicionnan di DVG y mas ainda MANGO mes.
Loading…
Reload document 
Open in new tab Algun procedura nobo cu nan a haci ta pone desinfectante na cada skina di tienda pa empleadonan haci limpi, a pone hand sanitizer pa tur paskamer, sign den tienda pa mantene distancia social. Pañanan cu hende a purba of debolbe, a pone nan den cuarentena of mester a steam esaki prome.
Ta dificil pa pronostica con e resto di aña lo bay ta, pero John Chemaly, director di maneho di MANGO, ta di acuerdo cu e carta di AHATA manda na gobierno. Mester percura cu no tin un un di dos ola. Ta mustrando cu na Merca lo bay tin un di dos ola, di cual Chemaly tin hopi miedo pa ora mester habri e frontera bek.“Mi ta compronde cu tin desesperacion di parti gobierno pa nan haya divisas, pero mi ta haya cu mester tin un miho manera,” el a expresa.
El a manda un carta pa Minister di Transporte, Chris Romero, riba AruParking. Den esaki e ta pidi e mandatario pa elimina AruParking y habri caya bek pa trafico. Tur esaki pa 1 aña y asina nan por forma un comision pa discuti e situacion di Caya Grandi biniendo cu un plan pa termino largo. E ta wardando riba un contesta di Minister Romero pa mira con e por sigui.
