Diahuebs ta un dia crucial pa un ex-funcionario. Den oranan di merdia e lo haya sa si corte a hay’e culpabel di malversacion.
Ta trata aki di Filomena Maduro acusa di malversacion na pia di trabou y Ministerio Publico ta papia di un suma di 1.3 miyon florin. E acusado ta nenga di a comete e hecho aki y ta kere cu ta un colega di dje ta envolvi.
Fiscal a pidi un castigo di 3 aña di cual un aña ta condicional, y dos aña di prueba. Tambe a pidi pa kita e suma di 1.3 miyon florin for di dje, o sea cu e mester paga esaki.
Un otro acusado dilanti mesa berde cu tambe tin di haber cu Departamento di Belasting, indirectamente, ta Solange Castro. Ta acus’e di malversacion na pia di trabao, estafa y falsificacion den e periodo di 2016 te 30 di mei 2023.
Den e caso aki ta papia di un suma di casi 3 miyon florin
Un caso cu a hala basta atencion y reaccion na momento cu esaki a bira publico. Acusa di estafa di miyones, Solange de Castro ta confronta awo husticia cu ta bay persigui p’e delitonan cometi.
E sospechoso, kende ta un belastingadviseur, lo a malversa suma di placa cu el a ricibi di su clientenan pa entrega na Belastingdienst. Ta sospech’e di e delitonan menciona cu tin di haber cu placa cu el a ricibi di e clientenan di su bedrijf pa entrega na belastingdienst.
Afpakteam di Aruba ta esunnan cu a tene e accion den Caya Frère Johannes, caminda a detene e sospechoso relaciona cu e investigacion di malversacion y estafa. Durante e huiszoeking a tuma placa cash, joyas, administracion y computers den beslag.
E caso ta pro forma, ya cu e investigacion no ta cera ainda. Ta apenas tres luna pasa a detene y ta papia aki di un suma basta grandi.
Manera conoci, Afpakteam ta un cooperacion di OM, Polis, Aduana, Fiot (Fiscale inlichtingen- en opsporingsteam), Marechaussee, Kustwacht, Meldpunt ongebruikelijke transacties (MOT) y RST.
Un otro caso riba rol pa un Regiezitting ta esun contra e funcionario policial Robert Vos. Anteriormente tabatin un Regiezitting pero Fiscal a bisa cu tin mas hende pa interoga. Den e sesion di diahuebs merdia lo haya sa si esaki a tuma luga.
E acusacion contra Vos ta malversacion na pia di trabao, tumamento di regalo y labamento di placa durante e periodo entre october 2018 te maart 2023.
