Diasabra pa alrededor di 3:30pm a manda patruya di Santa Cruz pa un problema di pareha na un adres na Macuarima. Ey e defensornan di ley a topa cu un homber masha agresivo cu a topa e Polisnan den cura cu un biga den man. Mesora Polisnan a saca nan arma reglamentario y a ordena e homber pa benta e biga abou. Parce cu e no a obedece y consecuentemente a tir’e den barica y a detene.
A pidi pa refuerso y e unidadnan cu a yega na e sitio a compronde cu ta constantemente tin asistencia pa e mesun adres y pa e mesun problema di maltrato. E homber cu frecuencia ta maltrata su señora den cas. Pero, e biaha aki e tabata determina pa bringa cu Polisnan tambe y eynan el a topa cu un tiro pa evita cu e ta sigui den su racha di agresividad.
Comisario Trudy Hassell a presenta na e sitio y a bay papia cu e victima, cu tabata scondi den un cas den cercania. Ey el a conta y desahoga tur e problemanan y maltratonan cu e ta pasa aden na man di su pareha.
Bisiñanan a conta cu ta constantemente tin discusion den e cas aki y Polis ta presenta cu hopi regularidad.
E condicion di e victima no ta conoci, pero e ta na tino y ainda cu tiro y cu mannan den boei, ainda e tabata menasa e Polisnan cu awor si nan lo mira kico e lo bay haci cu nan.
A tuma nota cu mesora despues di e susedido, e Chef van Dienst di Santa Cruz a presenta mesora na e sitio, a kita e arma reglamentario di e Polis y a transporta e colega pa Warda di Polis. Den casonan asina, mesora Landsrecherche tambe ta presenta pa asina investiga si e uzo di arma di candela tabata na su luga.
Probablemente e hecho aki ta bini poco despues cu Polisnan a haya nan mes confronta den un caso basta similar unda un homber a agredi un Polis mortalmente, te cu e otro Polis a haye ta tira e agresor cu resultado tambe fatal. Desde e dia ey Polisnan ta uza mas tactica y cautela na momento di atende casonan asina, unda agresividad ta hunga un rol.
