Polis: Ta Ministerio Publico a duna ordo pa e accion

“A bin un ordo di Ministerio Publico pa investiga asuntonan ilicito tumando luga den Olde Molen. A hinca un team den otro, di diferente afdeling di Gobierno, pa controla y verifica si berdad tin asuntonan ilicito tumando luga manera Ministerio Publico ta indica”, asina Lito Lacle, Vocero di Cuerpo Policial Aruba a duna di conoce awetardi despues cu decenas di Polis a tene un accion grandi na e club nocturno, rond di 6:00pm. Polis a confirma mas o menos 7 detencion na e sitio pero Lito Lacle ta sospecha cu mayoria lo ta ilegal.

Te na momento di e entrevista, Vocero di Polis no por a bisa nada cu si Polis a ogra haya sea arma of droga na e sitio. El a confirma cu tin un “huiszoeking” tumando luga na e momento ey. El a bolbe reitera cu ta un ordo a bin di Ministerio Publico pa haci e entrada hudicial mesora y pa 3:30pm a manda yama tur hende pa presenta na trabou y asina “hit” e establecimento di entretenimento.

Polis a enfatisa cu den un investigacion penal, Ministerio Publico ta e hefe y como tal nan ta simplemente cumpli cu ordo ricibi.

A tuma nota cu hasta Altocomisario Andrew Hoo tabata presenta durante e entrada hudicial aki, demostrando asina e envergadura di e investigacion, cu na final a produci net net nada!