Diasabra anochi, un poco mas prome cu 11:30 pm, polis a presenta na altura di Great Rich Bar & Restaurant na Paradera pa asina tene control riba trafico n’e sitio. Durante control, nan a bin detene un hende muhe disfraza na ocasion di Halloween, mirando cu e tabata mustra tiki riba su nek. A pone supla y despues a detene.
For di boca di e detenido, por a scucha cu a detene, pasobra a hay’e cu marihuana. Pero a nenga categoricamente cu e marihuana tabata di dje.
Mirando e gran cantida di auto y consecuentemente e personanan cu tabata di bishita na a restaurant, polis a pidi pa taskforce presenta pa asina tene nan control.
E luga tabata yena cu hende y por a scucha musica ta zona paden. Polis, conhuntamente cu varios otro miembro di e team, a drenta den e bar y despues di un rato, por a nota cu a paga musica y a scucha e anuncio cu fiesta a caya y cu lo cera e luga. Despues di un poco rato por a nota cu e hendenan a cuminsa sali, aunke ainda den ambiente.
Tabatin otro cu si tabata disgusta cu a cera e luga prome cu ora. Aunke tin di bisa cu a pesar di e ultimo aki, tur cos a cana manera mester ta.
Mientras tanto, a hiba e hende muhe deteni warda, caminda e lo mester a duna cuenta na fiscal auxiliar pa su acto.
