Awe tardi a sosode dos accidente tras di otro y den ambos caso a resulta cu e chauffer tabata un “hit & run”. Den e prome caso na Matadera el a dal den un auto, manda auto riba e chauffeur cu a baha reclama y despues baha na awa. Un rato despues el a dal den un otro auto na Tanki Leendert y eynan a baha na pia core bay. Polis tabatin un indicacion ta ken y a resulta cu ta un sospechoso cu nan ta buscando caba di basta dia. Pa colmo awenochi el a purba subi avion y bandona nos isla, pero autoridad tabata na tempo pa impedi esey.
Awe tardi ora di causa e accidentenan, e chauffeur di e V-Wagen Chevrolet Optra tabata bisti cu cu jeans preto y pechi color cora. E saldo di su iresponsabilidad awe tabata tres auto cu hopi daño material y tambe dos persona inocentemente herida. Uno tabata mas grave cu otro.
Awor e lo mester duna cuenta na husticia pa su actonan, cu aparentemente no ta limita unicamente na e accidentenan di awe so. Fiscal a duna ordo pa detene y ora a haya informacion cu e lo a biaha awenochi, a haya permiso di Hues Comisario pa impedi su viahe for di nos isla.
