Un medaya tin dos banda. Despues di scucha e declaracion di e homber Joshua denunciando cu tabata tin abuso di poder, a haya tambe e informacion di otro banda. Berdad un agente Policial a bay atende cu e homber Joshua na e parkinglot di Do It Center na Shaba.
Pa basta tempo caba ta busca drechi di Joshua cu mas bien ta tuma placa di hende y estafa hende. Despues di tuma placa y cu e placa no yega ta blokia telefon di esnan cu nan a estafa. Cu otro palabra, bo no ta haya e persona aki mas pa cuestion’e dicon e placa nunca mas a yega Venezuela. Nan ta bezig ta estafa Venezolanonan. Ta tuma nan placa na Aruba y bisa cu ta manda esaki pa nan ser keri na Venezuela. Ora cu bo kere e placa a bay, nunca e placa ta yega. Asina a bin tende di diferente keho riba e hendenan aki. Ta Joshua y un hende femenino mas.
Den e caso aki e agente tambe a haci un amiga un fabor y despues di yama Joshua, el a bin te na warda di Polis tres luna pasa pa tuma 150 florin pa manda esaki Venezuela. E placa aki nunca a yega. Ora a busca drechi via app pa Joshua, e tabata lesa nan pero no tabata contesta. Despues a blokia e number. A keda busca y despues di tres luna a bin tende con pa haya Joshua. Un hende a yam’e y bis’e pa bin den parkinglot pa topa hende pa placa. Eynan e agente Policial ta esun cu a bay pa topa cu Joshua. El a sali for di warda den su auto personal y a lage full su ekipo di trabou y faha cu arma na warda. P’esey e storia cu Joshua a duna cu e polis tabata arma etc ta un mentira. Tin camara tur rond eybanda cu por prueba esaki.
El a yega haya Joshua eynan y Joshua no a spera e agente cu el a estafa yega riba dje. A pidie pa e placa. Joshua tabata tin 90 florin cun’e. Un papel di cincuenta y cuater papel di diez. No 295 Florin manera e ta bisa. E agente berdad a ranca un telefon for di Joshua y pidie e otro telefon cu tambe e tabata tin den e auto. E placa tambe ta Joshua mes a entrega esaki. Mes momento a kita e yabi di e auto pasobra e auto no tabata tin belasting paga y tampoco keuringskaart. Ningun rato a kita e auto como muestra di poder. Ta e documentonan di e auto no ta na ordo. A bisa Joshua tambe riba esaki. A pidi takelwagen tambe cu a bay cu e auto warda. Despues na warda un hende grandi a yama y papia decentemente cu e auto ta di dje. El a bisa cu e no por yuda cu e persona ta tuma placa y cu e auto no ta di Joshua. A splica e persona na placa chikito cu e auto no a wordo kita riba e debe. A kita e auto pa falta di belasting y keuring.
Djey e mama tambe parce a yama warda. A mustra e mama riba e 150 florin cu a duna Joshua y cu nunca a yega. A bis’e tambe riba e 520 dollar cu tambe a estafa otro persona Venezolano. E cos ta cu nan ta tuma placa di Venezolano entre otro ilegal y asina e hendenan aki despues no por bay haci denuncia pa miedo di wordo deporta. Bo ta abusa di e situacion di e Venezolano ilegal pa tuma nan placa cu nunca ta yega Venezuela. E mama a admiti di e asunto di 520 dollar y cu un otro warda di Polis ta atendiendo e caso y nan ta bay paga of a cuminsa paga un parti. E mama tambe a pidi pa e auto cu a ser kita. A splica e mama cu e auto ta na warda pa falta di documento y nada di haber cu e debe di placa. Tambe a splicanan cu a kita e telefon y e 90 florin y a bisa Joshua pa bin warda atend’e cu e resto di suma cu falta. Y asina lo entrega e telefonnan bek. No a kita telefon pa e debe pero pa oblige bin warda atende e asunto. Esey a splica e mama tambe cu mester bin busca e telefonnan na warda.
Ya caba a avisa e superiornan y a splica na placa chikito kico a sosode. Tambe diabierna mainta nan lo bin warda pa atende cu e hefe riba loke a sosode. Mester remarca cu ningun rato so a mishi cu Joshua y ningun rato a bay cu ningun tipo di arma na curpa. A papia duro y fuerte cu Joshua y mustra cu e ta cana estafa hende tumando placa y nunca e placa ta yega Venezuela. Mescos cu Joshua tin varios hende mas asina ta cana rond probechando di e situacion dificil cu e stranhero ta pasa aden na Aruba pa estafanan. Bo ta estafa un hende awe, otro mayan tambe pero na dado momento bo ta bay topa cu hende cu ta bay para bo careda. Pa bo bin te warda di Polis tres luna pasa y tuma placa di Polis y nunca manda esaki Venezuela, ta un curashi hopi grandi mes bo tin. Spera cu esnan cu tambe a pasa aden mester alerta otronan pa no cay den trampa di e persona aki.
