Intoxicacion: Generator cendi den bar a causa 2 morto

Tur cos a cuminsa banda di 11:12pm ora cu Alarm Centrale 911 a haya yamada di emergencia pa 4 hende benta for di tino pafo di un bar den Caya Captain Rodgers na San Nicolaas. Prome unidad di Polis cu a yega a drenta Latin Passion Bar, banda di Caracas Bar y a pidi pa Ambulance cu urgencia. E homber bartender y tres otro persona mas.

Varios unidad di Ambulance a presenta, pero lamentablemente dos di esunnan cu tabata den e localidad a fayece, mientras dos victima a bay cu urgencia pa Hospital. E doño di e bar a splica cu e bar ta sin coriente y ta draai riba un generator. Tio Lopez ta biba eyden y ta habri e bar entre 6:00pm pa 11:00pm. E ultimo biaha cu e tabatin contacto cu e bartender den e edificio tabata anochi 9:00PM.

Dos morto y dos victima hiba hospital: Caso tristo den Bar Latin Passion

Posted by 24ora on Wednesday, July 22, 2020

E situacion a haya atencion ora mayornan a haya falta di nan yiunan cu no a yega cas. Asina a cuminsa un buskeda y hasta a bay Polis, pero a haya tende cu mester warda 48 ora prome cu start un buskeda general. Asina famia mes a keda insisti y a logra yega na e bar Latin Passion. E doño mes no a bay pa mas cu un dia na e bar. Ora cu e famia a yega parce nan a mira e situacion y a bati alarma na 911 cu na su turno a avisa Polis. Un investigacion a sigui mesora den e bar.

Yiunan di e dama cu a fayece na e sitio. Nan ta inconsolabel. Famia a bin cerca nan na e sitio, den caya Captain Rodgers na San Nicolas.

A cera henter e area di Caya Captain Rodgers. Bomberonan tambe a yega na e sitio y a drenta e localidad y ora cu a mira e situacion a sali bek y bisti nan ekipo di proteccion y bay aden. Ta sospecha cu generator den e localidad a causa intoxicacion. Asina mes a haya e hendenan benta den un situacion poco straño. Pesey mes mester haci un investigacion basta profundo pa saca afo realmente si ta e generator a causa e problema of algo otro nan tabata bezig cune.

Un di e dos victimanan yegando Hospital awe nochi. Dos ambulance a transporta dos mucha muhe cu urgencia. Un di nan ta di fam Van der Linden.

Polis mas den oranan lat di marduga a confirma cu pa 1:30am, Dr. Texier a constata morto di Maria “Mia” Figaroa di 47 aña di edad. E ta mama di dos yiu muhe y dos yiu homber. Mia ta yiu muhe di ex-Polis Lou Figaroa, cu semper a biba cerca di Warda di Polis bieu di Noord mes. E otro morto ta G. “Tio” Lopez di 42 aña di edad. E tabata biba na Hulanda pero a bin Aruba y como cu e no tin luga di keda, a regla pa e traha y biba den e bar na San Nicolas. Parce cu pa algun dia caba no tin coriente den e bar, pa cual ta uza un generator pa coriente.

Comandante di Cuerpo di Bombero a confirma cu ora e prome unidad di Brandweer a yega na e sitio, a constata presencia di gas, o sea Carbon monoxide, pa cual a bisti nan ekiponan special. Ing. Edward de Cuba a confirma cu e sintoma di e victimanan tambe ta cuadra cu e daño cu e gas aki ta haci. Bo no por hol’e, pero e ta haci Bo suf, por manda Bo den coma y por ta hasta fatal. Ta despues di hopi aña cu Aruba ta hay’e cun caso lamentabel asina atrobe, den cual 2 persona ta fayece intoxica den un luga cera.

Esunnan cu a fayece tabata e bartender y su pareha. Polis a bisa cu, mirando e investigacion cu mester sigui awo, cu Fiscal a tuma ambos cadaver den beslag, pa por conduci un investigacion forensico (autopsia) pa determina e causa exacto di nan morto. Hopi forsa na famianan cu perdida di nan sernan keri.