Na Sero Blanco un homber a desea su pareha un bondia y bon siman cu un mokete den cara. Esaki tabata pasa di 8or di mainta. Polis a bay na un compleho di apartamento pa un agresion. Un homber a dal un dama basta fuerte.
Ora cu Polisnan a yega a topa cu e pareha. E dama tabata tin sla na cara y un corta chikito bou di su wowo. Polis a puntra e dama si e lo entrega keho. El a bisa mesora cu si. Pesey mes Polis a bay over na detencion. A pone e homber na boei y prome cu esey mustre riba su derechonan. A pidi dogcatcher pa asina bay cu e homber warda di recherché pa atende riba e e maltrato cu el a comete. Na dado momento prome cu hiba e homber, e dama maltrata a core bisa Polis cu e no ta bay entrega keho mas. Polis a bise cu nan no por laga e homber bay mas.
Ya nan a detene y mester bay Recherche. Kizas eynan Recherche cu Sub Fiscal lo mira kico lo haci cune. Netamente e siman aki Fundacion pa Hende Muher den Dificultad ta hibando un campaña di concienizacion riba violencia domestico. E casonan di violencia domestico ta hopi na Aruba. Tin hende ta sali dilanti cu nan caso buscando yudansa y otronan ta sconde y soporta sla di nan homber. E motibonan ta diferente. Den e caso aki na Sero Blanco e señora a bati alarma y den mesun rosea a bisa Polis cu lo no entrega keho mas. E motibo dikon e no kier entrega keho mas y tog a yama Polis no ta conoci.
