Diadomingo anochi banda di 10’or a sosode un caso di hit and run na Tanki Leendert. Segun informacion ricibi un Ford Transit blauw a subi caminda dilanti brommer na Tanki Leendert.
Esaki a causa cu e brommer a dal den dj’e, pero e chauffeur di e Ford Transit no a keda na e sitio pa tuma su responsabilidad y a move bay. Awendia esaki ta conta basta pisa den ley y Polis a keda atento pa wak si nan logra di encontra e auto. E buscamento di Polis a duna su fruto, pasobra a encontra un Ford Transit blauw na un adres na Koerie Boerie.
E tabata cuadra cu e descripcion y cu tabata tin sla patras. Mesora a meld esaki pa Central di Polis y a solicita pa un takelwagen bin na e sitio , pa asina hiba e auto aki pa warda pa mas investigacion.
