Diadomingo alrededor di 2:00 am, presencia di unidad di ambulance tabata necesario riba e Tanki di Alto Vista. Pa algun tempo caba esaki a bira centro di algomeracion despues di orario di ciere. Gran cantidad di hoben adulto ta aglomera riba e tanki aki pa asina continua cu e “trip” despues cu e clubnan nocturno cera 12:00am
E prome informe ricibi cu tabata trata di bashament’i bala rib’e tanki. Mesora unidad di diferente districto a presenta pa asina atende cu e situacion serio aki. Ora cu 24ora.com a yega na sitio, varios unidad di polis tabata tin e salida cera.
Ta conoci cu ta un entrada y salida tin pa e area aki. Esaki a duna polis e oportunidad pa controla tur vehiculo bahando for di e sitio. Algun persona a indica di a scucha diferente tiro y tambe un confrontacion caminda un of mas persona a resulta herida. Tambe a papia di destruccion di un vehiculo cu a bandona e dicho tanki cu maximo urgencia.
A pidi presencia di ambulance cu urgencia na sitio pasobra na prome instante a indica di lo tabatin un persona herida. Tabata sospecha cu lo por a ricibi herida di bala. Esaki a resulta despues di no ta corecto. E persona aki lo bira malo of a haya golpi di cual a pone cu el a bay vloer. Ambulance a transport’e pa hospital.
A indica si cu tabata trata di mas di un tiro cu a scucha riba e tanki aki cu a pone cu mayoria hende a bandona sitio mesora. Incidente ta den man di autoridad cu ta investigando e caso profundamente.
