Biblioteca Nacional Aruba ta presenta sra. Hilli Arduin como participante na e Festival di Buki pa Mucha. Hilli Arduin ta un escritora di buki pa mucha, poeta y contador di storia. Hilli Arduin ta bishita diferente scol na Aruba den siman di dia 6 pa dia 10 di november.
Hilli Arduin a publica diferente buki di mucha manera ‘Prinses Ivana, het prinsesje dat haar haren niet wilde kammen’, ‘Aboikoni’, ‘Plonsen’, ‘Bigi Yari’ y tambe buki pa adulto ‘Slaapkamer geluk y ‘De donkere tranen van zijn moeder. ‘Poesia pa mucha’ ta un coleccion di poesia pa mucha di tur edad. E poesia ta conta di temanan di antes, manera Sclavitud pero tambe di cosnan di awendia. Hilli Arduin a nace na Surnam y a lanta na Corsou. Hilli ta biba mas cu 40 aña caba na Hulanda y tambe Surnam. Hilli Arduin su poesia a keda publica den diferente buki. ‘Poesia pa mucha’ tabata su prome buki di poesia pa mucha. E escritora di buki pa mucha a studia pa maestra di scol, despues pa Ortopedagoog y Sicologo. Hilli tin un pasion grandi pa skirbimento y contamento di storia. E ta biaha hopi rond mundo pa conta su storianan. Storianan di Compa Nanzi, di solo y luna, riu y cero, bruha y spirito y mucho mas. Hilli ta hopi entusiasma pa bin Aruba y conta hopi storia.
Biblioteca ta invita tur mucha pa topa cu tur e autornan y ilustrador pa e fiesta di apertura di e festival grandi. Fiesta lo ta patras di biblioteca na Playa y ta di 6or pa 8or. Biblioteca lo ta habri riba e dia ey tambe pa mucha por pasa lesabuki, bira miembro, presta buki y por entrega buki cu ta lat sin paga boet. Un y tur ta bon bini.
