Pius X tabata e prome scol cu a cuminsa cu un proyecto participando na Raad van Kinderen di e fundacion di Prinses Laurentien. Den di dos aña di nan participacion, nan a yega na e top 3-nan di Caribe y a gana e Brons Award di Kids Council.
A bay Hulanda, hunto cu nan sponsor Divi, pa ricibi e premio. E compania a adopta e scol pa mas o menos tres aña. Durante e periodo aki e muchanan ta trece diferente idea pa problemanan cu nan ta mira. E di dos aña a participa atrobe cu Divi y a gana e Silver Award.
Pa loke ta e airconan, ta hopi tempo a bin ta trahando riba e proyecto aki. Pero tambe nan tabata consciente cu e ta costa hopi placa. En principio a haya aprobacion di Gobierno cu lo haya airco, pero el a wordo para. Despues nan a haya e sorpresa for di sr. Alex Nieuwmeyer Managing Director di Divi, kende a bisa cu nan kier contribui cu Pius X como gratitud pa e “exposure” cu nan a ricibi for di e participacion. Nan a cuminsa busca oferta logrando un bon deal. Mester a cambia nan sistema di coriente, pa logra instala e airconan.
Awor tin un ambiente hopi mas agradabel den klas, cu menos desordo cu ta bini di e trafico pafo. E juffrouwnan a constata caba cu e muchanan ta hopi mas atento y e dia ta bay mas facil. Juffrouw Tromp ta encurasha comerciantenan, manera Divi a kere den Pius X, pa sigui kere den e scolnan y duna un man.
Pa cubri e gastonan, a introduci un airco geld. Esaki lo bay pa pago di e gastonan di coriente. Mayornan ta dispuesto pa contribui.
