Diahuebs tabatin entrega oficial di e tabletnan cu Divi Tamarijn All Inclusive y Divi Impact a haci na Pius X School. Ta trata di un donacion di 200 tablet na e scol, cual ta bay uza riba un plataforma digital di enseñansa, segun cabesante di e scol, Sheila Lazo-Tromp.
Si wak bon, mirando en particular durante e pandemia, mundo digital a bay riba un rollercoaster. E tabata un caminda cu nan a cuminsa prepara pa cana. A desea pa e muchanan por haci les un poco riba e parti digital. Ainda ta pensa cu nan mester por uza nan sinti den e parti manual, e directora a splica.
Tabata un proyecto cu a traha riba dje y ta spera cu esaki, mirando cu e ta mas atractivo pa e alumnonan, capta nan atencion hopi rapido.
A sondea y haci hopi investigacion riba e software cu nan ta bay uza y ta mustra cu ta bay duna hopi resultado. A mira diferente scol na Hulanda, na Alemania, Francia y ta bezig awor aki cu Spaña y Boneiro. Ta spera cu esaki por subi e motivacion di e muchanan, como tambe por mehora e enseñansa na Pius X.
Ta un proyecto piloto cu ta cuminsa desde klas 2 pa klas 6. Cada mucha ta haya nan tablet,pero e tablet ta keda scol. Riba dje ta haya lesnan di matematica, idioma y lesamento. A check cu proveedornan na Hulanda, kico ta e rekisitonan cu e muchanan tin mester pa e tablet.
Na Hulanda, tin mucha ta bin cu nan propio tablet. Pero pa Pius X esaki tabata un tiki dificil. A bay sondea un tablet cu ta cumpli cu loke ta pidi. E tablet ta un Amazon Fire 7, cu ta un kids edition. E tin un bon cover, cu e muchanan por traha hopi facil y via e plataforma e muchanan ta bay traha.
E unico diferencia pa cuminsa ta, cu na scol ta traha den werkboek y e muchanan ta traha den nan oefenboekjes. Awo e ta bay ta diferente, aunke cu awo cu tablet. Nan ta bay traha den e tablet na luga di skirbi den schrift, pero por lo general tur e resto di cosnan ta keda mesun cos.
Mucho dificil no tabata pa yega na e tipo di tablet cu tabata tin mester, pero si tabatin mester di e fondonan pa cubri e proyecto aki. Den esey a acerca Divi & Tamarijn All Inclusive y Divi Impact, cu ta hopi bezig cu Pius X. Un biaha mas a kere den e proyecto y a facilita e tabletnan.
Directora di Pius a bisa cu nan ta na altura cu tin algun scol ta trahando cu tablet. Esaki sigur ta algo tremendo, segun Lazo. “Ohala cu por yega na tur scol y haci esaki. Fondonan ta bira pa esun cu tin’e dificil.” Lazo a expresa cu si tin un soño mester bay p’e. “Esey ta loke a pasa cu Pius X. Un caminda bo ta haya un hende pa kere den bo.”
E docente ta haya cu tin hopi comerciante eyfo cu por mustra nan solidaridad y purba yuda un scol, hiba nan p’adilanti. Esaki ta sostenibilidad y durabilidad, ora cu ta inverti den enseñansa. Ora cu no ta solamente spaar, pero cu ta kere den e muchanan y ta inverti realmente den nan. Esaki ta un ehempel di esey, el a bisa.
Ta pidi tur hende, tur comerciante, tur compania pa kere den e scolnan, kere den enseñansa. Hopi scol ta logra cu proyectonan di afo. Pero tin na Aruba tambe. “Nos ta pasando den un temporada hopi duro y pa e comerciantenan, esaki ta duro. Sinembargo, no imposibel. Ta mescos cu tin uno cu a kere den Pius X, tin hopi otro cu por kere den e demas scolnan. Keda traha hunto y keda lucha pa bay dilanti,” Sheila Lazo-Tromp a bisa.
