Prome Minister Evelyn Wever Croes tabatin un reunion diaranson mainta cu tur e hefenan di departamento. AEsaki ta tuma luga normalmente asina cu un Gobierno nobo sinta. Un di esnan presente na dicho reunion tabata Procurador general Alexander van Dam, kende a representa Ministerio Publico.
Van Dam a bisa di ta mira e reunion aki uno sumamente positivo y ta mire como continuacion di un reunion anterior riba integridad, unda a papia di e importancia di integridad cu ta cuminsa cerca e hefenan di departamento. Si Gobierno demostra cu nan ta tuma e tema di integridad na serio, di mes e ora e funcionarionan tambe ta bay mir’e di e forma aki. Pero vice versa tambe ta berdad. Cu esaki e ta bisa cu si e personanan cu ta e lidernan, e hefenan, no ta integro y ta mira esaki, nan tambe ta bay actua di e mesun forma.
Esaki ta un tema cu Departamento di Recurso Humano a trata mas o menos un aña pasa caba cu hefenan di departamento y awor Gobierno nobo por medio di Prome Minister a expresa na tur presente cu esaki ta algo cu nan ta tuma hopi na serio. “Mi ta kere cu e Arubiano tin derecho riba un gobernacion integro. E Arubiano mester tin e siguransa cu ora e entrega un peticion, e ta wordo trata di e mesun forma cu su bisiña kende kisas pa casualidad ta miembro di un partido politico.” El a sigui bisa cu integridad tin di haber cu tur cos, cu estado di derecho (democratico) y Aruba tin un estado di derecho democratico. “P’esey mi ta kere sin duda cu integridad ta forma parti di e estado aki.”
E ta di acuerdo cu integridad no mester conta solamente pa e ambtenaarnan, pero tambe pa e ciudadanonan y sector priva. Den tur area mester tin e base di integridad pa tur hende sa ki nan por spera. No mester lubida cu investigacionnan haci ta mustra cu pais ta perde hopi placa cu e asunto aki, cu violacion di integridad, ora cu personanan ta wordo cumpra y proceduranan por bay dura hopi mas largo. Tur e placa cu ta bay perdi pa violacion di integridad ta bay a costo di pais.
Pa finalisa el a bisa cu for di su Recherchenan e ta scucha cu tin hopi keho reclamo di falta di integridad, pero, el a sigui bisa, esaki ta algo cu ta sosode na Hulanda tambe. “Mi no ta tribi hinca mi man den candela ni pa Hulanda ni pa Aruba pa integridad. Pero importante ta pa tur hende bira consciente di e importancia pa integro.”
