Dia dies februari awo lo haya sa si Zachary Quandt ta keda cu e 10 aña impone riba dje pa asesinato di Ski, ta aument’e of ta bah’e.
E siman aki Corte di Apelacion a trata e caso penal di asesinato di e adicto ambulante Hubert Arrindell, miho conoci como Ski, kende a ricibi bala di un arma di candela dia 18 di augustus,2018.
Despues di e sentencia di 10 aña den 2019, Ministerio Publico no a keda satisfecho cu esaki pa motibo cu ta trata di bida di un hende cu a wordo kita. A pidi un castigo di 18 aña, pero Hues na final a impone 10 aña.
Esaki ta e caso unda cu un grupo di hoben a sali riba un trip cu tabatin un final tragico. Un di e personanan den e auto tabatin un arma di candela, cu e hoben Zachary Quandt a pasa man cun’e y a los tres tiro direccion di un grupo di persona, entre nan e adicto ambulante Ski.
E tratamento di e caso tabata un ripiticion di loke a pasa riba e fecha en cuestion. Ski despues di e sucedido a bay for di sitio y a cay na caminda, unda ambulance a buske. Pero tambe por corda cu Ski a dicidi cu e ta bandona hospital y no a haya e tratamento medico necesario. E tiro ricibi a afecta su tripanan.
Abogado mr. Chris Lejuez a señala cu rapport di Patologo ta mustra cu Ski a haya complicacion, tanto di e tiro cu el a ricibi como di un otro problema di salud cu tabata afect’e. E rapport no por a determina kico exactamente a causa su fayecimento.
Sinembargo ley ta specifico riba esaki. Apesar cu por tin otro problemanan di salud, ley ta bisa cu loke a causa cu e mester a bay hospital pa haya tratamento, den e caso aki e bala ricibi, ta haci cu e persona en cuestion ta keda responsabel pa esaki.
Defensa di su banda a bisa cu nan no kier pone un banda e hecho cu Zachary a tira e anochi ey, pero mester tene cuenta cu no ta solamente e tiro a causa morto di Ski, pasobra e tabatin mas complicacion cu a conduci na su fayecimento. Pero tambe a papia di kico lo mester ta e castigo corecto. Defensa a trece dilanti cu aki no por papia di premeditacion, no tabatin un plan traha di parti di e mucha muhe Zachary cu e anochi ey ta sali pa mata Ski haciendo uzo di un arma di candela. P’esey e castigo normalmente ta hopi mas abou cu asesinato.
Pero Procurador General di su banda tabatin otro opinion. E ta haya cu aki a kita bida di un hende y no ta di acuerdo cu 10 aña ta mustra e seriedad di e caso, pa cual el a pidi pa subi esaki na por lo menos 12 aña.
Mr. Chris Lejuez a bisa cu su cliente tambe a expresa y mustra di ta hopi arepenti di loke cu a pasa e anochi en cuestion. A pidi pa tene cuenta cu su edad relativamente hoben, e ta un mama, pero tambe e ta un “first offender”. “E ta un persona cu tin hopi duele di loke a sosode, ora cu e tabata bou influencia di alcohol y droga. E ta un persona cu kier cambia su bida, kende actualmente ta haciendo tur esfuersonan pa drecha su bida. E ta tumando les pa e haci su examen di MAVO pa drecha su bida ora cu e sali bek. E no ta un persona cu no ta preocupa cu loke a pasa. E tin hopi soño di tur loke a pasa e anochi ey. E sa cu loke el a haci ta algo grave y nos ta kere cu 10 aña di castigo ta suficiente.”
Dia 10 di februari awo Hof lo anuncia su decision riba e caso aki.
