E prijsnan di petroleo a baha awe despues cu exportacion di crudo for di Medio Oriente a aumenta y e paisnan di e Grupo di Shete (G7) a priminti di aumenta e suministro. Sinembargo, e presion pa bende petroleo a keda limita pa e temor pa mas interupcionnan den suministro como consecuencia di e guera entre Merca, Israel y Iran.
E futuro di crudo Brent a baha cu 43 cen, of 0,4%, pa $101,82 pa bari. Entretanto, e crudo West Texas Intermediate (WTI) di Merca a baha cu $1,50, of casi 1,7%, pa $89,61.
E referencia Brent a haya sosten di un aumento nobo den e prijsnan di productonan di combustibel. Segun analista di Saxo Bank Ole Hansen, e plan di G7 pa libera crudo y diesel durante e proximo cuater lunanan ta ofrece solamente un alivio di corto plaso y ta haci poco pa resolve e limitacionnan structural cu ta afecta e suministro di productonan refina.
E futuro di gasoil na ICE a subi alrededor di 2%, pa $1.377,25 pa ton metrica. CEO di BP, Meg O’Neill, a bisa durante e conferencia Energy Intelligence na London riba dialuna cu e compania a adapta su refinerianan pa enfoca mas riba produccion di diesel.
Suministro ainda ta limita
Brent a perde gran parti di e ganashinan cu el a registra siman pasa, mientras WTI a baha 1,6%, despues cu e paisnan di G7 a acorda diabierna pa libera 100 miyon bari di diesel y crudo for di reservanan di emergencia.
E paisnan a priminti tambe pa no pone restriccionnan riba exportacion di energia, despues di presion di Presidente di Merca, Donald Trump.
E liberacion di e reservanan lo agrega na e exportacionnan di crudo for di Medio Oriente. Segun e datonan di transporte maritimo, e exportacionnan a pasa e nivelnan anterior na e guera durante cuater di e shete dianan di e ultimo siman di september, a pesar di atakenan contra barco cu tabata pasa door di e Estrecho di Hormuz.
Ainda no ta cla cuanto di e petroleo inclui den e acuerdo nobo di G7 lo bin di loke a resta di e pacto di maart. E pacto tabata trata di un liberacion di emergencia di 400 miyon bari, coordina pa e Agencia Internacional di Energia (IEA).
Director ehecutivo di IEA, Fatih Birol, a bisa siman pasa cu e paisnan miembro a libera aproximadamente dos tercera parti di e 400 miyon bari cu tabata forma parti di e acuerdo.
Entretanto, Aramco a baha inesperadamente e prijsnan di crudo pa Asia pa luna di november y e prijsnan a yega na nan nivel mas abou den seis aña.
Un otro factor cu por aumenta e falta di productonan refina ta e decision di Ucrania pa continua atacando refinerianan di petroleo na Rusia. Presidente di Ucrania, Volodymyr Zelenskiy, a bisa Reuters den un entrevista publica diadomingo cu su pais lo continua cu e atakenan.
