Personal di MDC a cansa y a entrega Manifesto na Prome Minister

Sindicato SEPPA hunto cu su miembronan trahando na Multi Disciplinaire Centrum (MDC), tabata dilanti sede di Gobierno diarason mainta pa expresa nan preocupacionnan.

Secretario General di SEPPA Magaly Brito a splica cu for di 2018 (inicio) a bin ta tratando pa yega na un palabracion cu Minister di Enseñansa di kico ta su Vision y Mision pa loke ta e rol di MDC den henter e sistema di Enseñansa.

 

Mescos cu den e otro problemanan den e sector aki, e Minister ta bisa algo y despues ta cambi’e. Esaki ta e mesun problema cu tin cerca docentenan di SPO y na Traimerdia.
Nan ta sinti cu e mandatario ta keda insisti pa haci un di e seccionnan di MDC, esta e parti di ODC, mas chikito. Pues enbes di reenforsa MDC pa nan sigui brinda miho servicio, scuchando e profesionalnan trahando eynan, e ta debilita e servicionan di e centro. Awo e trahadonan a cansa di papia cu e mandatario pa cual a dicidi di entrega un documento hopi detaya na Prome Minister Evelyn Wever Croes, como cabes di e Gobierno. Den e documento ta splica tur locual cu a bin ta haciendo for di inicio di 2018, y cual tabata e reaccionnan.

 

Tambe ta poni den e documento cu e caminda cu e Mandatario ta tumando na MDC no ta algo cu ta cumbini e muchanan cu ta depende grandemente di e servicio cu ta wordo duna eynan.  “Nos ta spera di por haya un bon reaccion di Prome Minister, cu e por haci algo di berdad.”Un copia di e documento aki a keda entrega na Parlamento tambe.Sigmond Jandroep, ta traha como Logopedista na Centro Multidisciplinario, tambe tabata presente den e grupo cu kier a expresa nan sentimentonan di loke ta reina rond di MDC. “Nos ta hopi preocupa pa e situacion actual den Enseñansa pa tur e cambionan tumando luga, e maneho di Minister di Lampe. Ningun hende cu ta den Enseñansa actualmente tin un bon bista di unda e maneho aki ta bayendo,” el a bisa.

Nan inkietud mas grandi ta e cambio cu kier haci den MDC. E organisacion aki semper tabata consisti di dos seccion, di cual uno ta e Centro di Observacion. E ultimo aki ta pa yuda e muchanan cu riba nan propio forsa no por move den Enseñansa regular. E Centro di Observacion ta tuma e muchanan pa un tempo y yuda inculca den nan e capacidad necesario pa despues nan bolbe sea den Enseñansa Regular of Enseñansa Special. “E Centro di Observacion a demostra caba cu e tin su derecho di existencia. Un gran parti por a reintegra bek den scol regular ….”Den e Manifesto entrega ta pidi pa no trece cambio den e MDC y yena e vacaturanan cu ta habri ainda. Pues pa no reduci e personal ya cu e lo afecta e servicio.SEPPA awor ta keda pendiente riba kico ta resultado di e intermediacion di Prome Minister Wever Croes.