E asunto di coronavirus tin mundo den un histeria masivo y precaucionnan ta wordo tuma tur caminda, hasta aki na Aruba. Pero tin biaha esaki ta wordo ignora.
Un Arubiano, Erika Chemaly, a bay Merca, pa ta specifico Miami, pa bishita dokter y a conta nos cu el a wordo exponi na tur tipo di bacteria y virus na e luganan cu el a bishita.
Na momento cu el a regresa bek, e mes a tuma tur precaucion necesario pa asina evita mas exposicion.
Durante su vuelo di regreso pa Aruba, tabata un di e pasaheronan cu si tabata infecta cu e virus y e, hunto cu e demas pasaheronan a pidi pa no laga e pasahero particular aki subi riba e avion. Sin embargo nan a lage subi toch.
Den tur momento e Arubiano ta conta cu e tabata tin su mask bisti y solamente na dos ocasion el a sa di kit’e, sea ta pa come algo of bebe.
Na momento di yega Aruba, a haci e test di temperatura pa mira si tin keintura, sigui pa yenamento di un formulario di Departamento di Salud Publico (DVG), unda cu nan lo mester contact nan via telefon of bin controla na cas. Tal papel a wordo firma, pero nunca a haya un yamada.
Diamars mainta, mirando cu ningun yamada a wordo haci manera indica riba e documento, a dicidi pa yama un otro pasahero cu tabata riba e mesun vuelo cun’e pa mira si e si a wordo yama, cual si a sosode y a haya tempo pa por a test.
Obviamente e pasahero aki (esta e protagonista di e odisea aki), mes a tuma contacto cu DVG y a conta nan su situacion di salud y su travesia cu el a pasa na Miami y tambe abordo di e avion. Tambe el a conta e funcionarionan cu e tin e sintomanan, pero no tabata sigur si esaki tabata klop si esaki lo a bin di e virus of djis un griep of verkoud.
E funcionarionan a cont’e cu mirando cu el a bin ta sali y drenta for di hospital y clinicanan y cu e tabata riba e avion, e mester haci test pasobra cu e tin e sintomanan. A avise cu e por bin test e mesun dia, cual tabata riba un diahuebs merdia, cual el a haci tambe y cu e lo ricibi su resultadonan den 48 ora, contrario na e otro pasahero cu nan a bisa lo a haya sa di dje dentro di 30 ora.
Apesar cu ta DVG mester a tuma contacto cu e pasahero aki pa asina haci su testnan, ta e mes mester a tuma e iniciativa pa haci e test y mira si e tin e virus of no. Asina mes e ta gradicido cu DVG a tuma accionnan rapido.
E pasahero aki no a wordo yama bek. Semper ta e mester a yama pa asina e sa kico ta su status pa loke ta su situacion y hasta, si e test sali negativo y cu e ta sinti cu e tin e sintomanan pa bolbe wordo getest. Asina mes, e no ta haya ningun yamada. Finalmente el a ricibi un yamada di parti di DVG, pero despues di tanto bay bin.
Diabierna anochi cu stress di atakenandi tos, el a dicidi di dal un baño y descansa, mirando cu henter e cos aki ta afectand’e hopi mes.
Diasabra mainta el a haya yamada di un señora kende a bis’e cu pa 10’or di mainta otro persona lo yam’e. Pero esey no a tuma luga pa cual el a dicidi di yama DVG atrobe, y ora cu el a haci esey, un homber bruto y fresco a contest’e y a trat’e hopi fresco y hasta a cera telefon den su orea.
E señora (biahero) a dicidi di yama otro number y duna su keho atrobe y a bise cu pa 10.30 e lo haya un yamada bek. Pero 11’or a bati y ningun yamada a drenta. Pa 11.02 el a haya yamada di esun cu mester a yam’e pa 10’or di mainta y el a pidi su disculpa pasobra e mester a acumula mas información.
“Mi a expresa na e di dos señora aki, kende tin masha bon manera, cu mi ta agradecido cu nan a haci e test y ta precavido, pero cu e forma con henter e situación a bay ta un caos completo y ta trece confusión. Ami mester cana nan tras y esey no ta corecto. Mi ta comprende cu nan team ta chikito y con ocupa nan ta, pero si ta haci algo, e mester wordo haci corectamente, nada mediocre, specialmente ora cu e tin di haber cu salud.”
E pregunta cu e ciudadano ta keda cun’e ta, ki momento e por haci su test cu por ta un negativo falso, y a inform’e cu nan no por haci esey, y cu nan lo tuma contacto cu su dokter di cas pa mira ki tratamento e mester sigui awo. E biahero a puntra di biaha cu si e sintomanan bira pio kico ta pasa, y e contesta tabata cu su dokter di cas lo sa kico pa haci.
Den e combersacion cu a sigui, e señora a pidi pa mand’e copia di resultadonan di su test, cu nan a inform’e cu e tin derecho pa haya nan y esaki lo wordo manda pa su dokter di cas.
Pero di tur manera, el a keda stress pa pasa un test di nobo, pero nan a bis’e cu esaki no ta posibel aworaki. “Obviamente esaki ta lagami cu un sentimento di ansiedad y di preocupacion pasobra mi no ta realmente sigur di e resultado aki y ta preocupante pa mi y mi famia.”
E pregunta, e ta bisa ta keda, “pakico nan a yamami mainta puntrami pa mi sintomanan y a bisa cu mi resultadonan no ta mucho cla … y despues a bisami cu nan ta negativo. Mi ta kere cu mi mester bira pio prome cu mi haya sa e berdad.”
