Diaranson mainta tempran, den careda di 8’or, unidadnan di Strandpolitie a mobilisa cu urgencia den direccion di costa nort di Aruba, tras di Lighthouse. E yamada cu a drenta tabata cu un persona a coy e direccion cu no mucho bon intencion.
A cuminsa un buskeda pisa ya cu famianan ta preocupa cu nan ser keri cu tabata mustra hopi desespera y nan a pensa cu e lo tin mal intencion debi na problemanan cu e tin.
Dos unidad di polis a cuminsa cu buskeda den e area di Arashi te na e costanan di Lighthouse bay ariba, pero no a topa cu ningun persona cu ta mustra desespera. A topa cu un persona, pero e no ta mustra di tin problema.
Despues di casi un ora buscando, famianan a yama Polis pa pone nan na altura cu e familiar a yega cas y e ta den bon estado. Nan a gradici Polis pa e ayudo y a cancela e buskeda. E famia tabata preocupa pa motibo cu e familiar aki no ta bon di salud tampoco.
