Un situacion basta serio a surgi den Scobillostraat y Betonicastraat na Pos Chikito ora cu un homber a presenta cu cuchiu den man pa agredi un otro. A cuminsa un persecucion y na altura di Rotonde di Pos Chikito a bati alarma pa un persona seriamente herida.
Mesora polis a activa y manda diferente patruya direccion Pos Chikito. Esaki a tuma luga den careda di 5:30 pm ora cu a indica cu e sospechoso lo tabata cu un cuchiu den su poder y lo a hinca e persona aki na su nek. A cuminsa un buskeda den area y a bin topa na prome instante, cu e victima na Rotonde di Pos Chikito tur na sanger.
A pidi presencia di ambulance cu urgencia mirando cu e tabata sangra profuso. Mes momento a sigui cu e buskeda den Scobillostraat caminda a bin topa cu e agresor na su cas.
A detene e persona aki mientras demas departamento a presenta, pa asina cuminsa nan investigacion riba kico tur a tuma luga. A transporta e agresor pa warda di San Nicolas.
No tin informacion concreto kico tur por a surgi entre e dos personanan aki, cu a hiba na e agresor pa comete e acto aki. E tabata basta decisivo y a core tras di e victima te ora a logra cinc’or y lago herida atras. Un situacion basta serio y un intento drastico contra bida di un otro persona.
Segun por a compronde, e detencion di e agresor a tuma luga na su cas mes y akinan ta caminda e departamento concerni lo sigui su investigacion. A logra confisca e arma tambe, cu nan a tuma den beslag.
