Hues a haya holo di persecucion politico den e caso di Gerald Vingal contra Gobierno di Aruba y a dicta na fabor di e empleado publico, cu alabes ta un politico tambe. Gabinete Wever-Croes, cu ta esun cu ta persiguiendo e ambtenaar ta haya nan mes ta sigui paga su salario y eventualmente pone bek den su funcion, pasobra no tin motibo valido pa a kit’e fo’i trabou!
Persecucion politico
E tabata traha pa Ministerio di Husticia ora cu diripiente, dia 13 di april 2021, ora cu el a anuncia su candidatura riba lista di Accion 21, cu su mañan nan a cera tur su accountnan na trabou. Esaki a sosode bou maneho y probablemente riba ordo di Minister Andin Bikker. A manda Vingal cas, bisando cu a cuminsa cu un investigacion interno riba su funcionamento, cu a desemboca den su retiro, mas di un aña despues!
E proceso legal
Corte a dal Gobierno un sla duro e siman aki, ora a ordena nan pa sigui paga salario di Gerald Vingal, (ex) director di Migracion. A kita su salario for di momento cu a mand’e un carta dia 13 di juli 2022, bisand’e cu e ta haya retiro inmediato como castigo disciplinario. For di e tempo ey Gerald Vingal no a ricibi su salario mas. El a entrega un obheccion dia 12 di augustus 2022.
A cuminsa caso contra Gobierno
Gobierno no a haci nada cu e caso, pa cual Vingal a dicidi di acudi na Corte na februari 2023, pasobra e no tin trabou y no tin otro entrada. El a pidi un “voorziening bij voorraad”, cu ta brinda e posibilidad pa ehecuta un veredicto di biaha aunke e caso principal of apelacion no ta cla ainda.
Gobierno: Gerald Vingal a faya como director
Gobierno a bisa cu e motibo cu a pidi pa su retiro inmediato ta debi na su incumplimento pisa pa cu su debernan. E incumplimento aki ta asina serio cu no por papia mas di confiansa den integridad di Vingal como funcionario publico. Gobierno a bisa cu el a viola secrecia di trabou (juni 2016), no a cumpli cu su debernan y a permiti su personal pa viola reglanan di trabou. No a haci nada cu e violacionnan, a acepta regalo y tolera tambe cu su personal ta ricibi regalo. En general a bisa cu el a duna mal ehempel y no a actua contra actitudnan fout di e personal.
Gerald Vingal a defende su mes
Loke cu a hala atencion ta cu Gerald Vingal a representa su mes den e caso aki cu el a gana. El a bisa hues den e caso aki, cu nada di e acusacionnan ey cu a haci contra dje ta berdad y cu den e caso di bodemprocedure lo keda demostra cu e no a haci nada cu merece su retiro di e forma aki.
A lag’e sin trabou y sin placa
E situacion di Gerald Vingal ta dificil ya cu for di juli 2022 e ta luchando contra su retiro, e no a ricibi su salario mas. Y e aña’ki el a haya su mes den un situacion cu e no por cumpli cu su obligacionnan financiero manera pago di su hipoteca y pago di otro prestamonan. Su peticion ta pa e sigui ricibi su salario mientras cu no tin un decision final den su caso.
Kico ta un “voorziening bij voorraad”
Pa cuminsa, pa bay di acuerdo cu un peticion asina mester existi un chens grandi cu e por gana su caso den bodemprocedure. Y si ta existi un situacion cerca e funcionario asina serio cu no por spera di e funcionario pa e spera riba resultado di su bodemprocedure.
Investigacion a cuminsa
Prome cu aña 2016 nunca tabatin un investigacion disciplinario contra Gerald Vingal. Tin un storia presenta na corte cu na 2016 a scuch’e como testigo den investigacion contra un subalterno di dje. Un caso cu ainda ta habri, despues shete aña. Loke cu a pasa den e caso aki ta cu a pidi retiro di Vingal siendo cu no tin un caso penal contra dje y pa colmo na mei 2021 a deshaci of a reorganisa IASA y no a hinca Vingal den funcion igual den e organisacion “nobo”, esta Migracion Aruba. Despues cu a lanta e organisacion nobo a bolbe tuma contacto cu Vingal pa papia cu ne riba su incumplimento di debernan como funcionario publico. Naturalmente el a reacciona bisando cu ta inhusto pa bin reclam’e e momento ey pa algo cu supuestamente a sosode shete (7) aña prome.
A kibr’e financieramente
Pa loke ta e caso mes, Gerald Vingal a presenta prueba di banco cu ta demostra cu e tin un atraso grandi den pago di su hipoteca y otro prestamonan cu el a haci. A dun’e apenas tres siman pa paga un suma di mas cu 35 mil florin. Esaki ta motibo suficiente cu tin necesidad di un decision urgente den su caso.
Gobierno a tap su celular
Pa demostra cu el a falta cu su debernan laboral, mester por demostra cu e tabata responsabel pa cualkier eror. Den Corte a menciona cu tin un combersacion di dje getap, pero no a incluie den e dossier di e caso. Ta papia aki cu e lo a informa di un supuesto inval durante Aruba Summer Festival. Y e relato di esaki cu tin den e dossier no ta suficiente pa bisa cu e ta culpabel na esey. No a keda demostra te cu awo cu e no a actua contra “plichtverzuim” di su empleadonan.
No por prueba cu el a haya regalo
Corte ta bisa cu e solo echo di acepta regalo no ta nifica “plichtverzuim” pasobra den su carta di retiro no ta menciona e asunto di acepta regalo, sabiendo cu tabata spera cu e ta haci of duna algo a cambio, manera e formulacion den ley ta. Loke nan ta menciona como regalo tabata cuminda pa e personal den fin di siman, banners cu tabata pa e departamento y television y standnan cu despues a resulta di ta di un miembro di personal mes. E cumindanan tabata pa personal cu ta traha extra of duro durante un periodo y ta haya e bonnan aki cu Directie Financien mes ta paga. El a haya entrada gratis pa algun evento, mescos cu diferente otro hefe di departamento, pero no ta demostra cu a pidi of duna algo a cambio.
Hues: Gobierno ta suak para
Corte a conclui tambe cu durante tratamento di e caso, Gobierno no por a demostra di ki forma Gerald Vingal a haci mal uzo di su funcion como hefe di departamento y di ki forma el a “hits op” e personal di IASA contra decisionnan di Conseho di Minister. Mas ainda si esun encarga e tempo ey cu Inmigracion (Icho Matos) tabata presente den e reunion riba e sistema di IASA cu a tuma luga na oficina di GAMMA. Pues Corte a conclui cu ta formula di forma general y no hustifica pa cual hues no por evalua of bisa concretamente si Gerald Vingal a haci su mes culpabel na e puntonan cu su doño di trabou ta acus’e di dje.
Acusacion di ta forma parti di un organisacion criminal
Tambe den e carta di retiro ta papia cu Vingal tabata forma parti di un organisacion criminal dedica na contrabanda di hende. E echo penal aki di ningun forma a wordo splica / proba durante tratamento di e caso. Pa colmo no tin un caso penal contra dje tampoco!
Corte: Sigui paga su salario
Conclusion ta cu e carta di retiro lo no tin chens den un bodemprocedure pasobra no a proba cu el a haci su mes culpabel pa e motibonan pa cual a pidi su retiro. Pa evita cu ta perhudic’e mas ainda, tin motibo pa tuma un decision aworaki caba riba su peticion, esta di schors e decision di retiro mesora. Esaki ta nifica cu e mester sigui haya su salario desde dia 13 di juli 2022 y sigui pag’e.
Tocante Migracion Aruba
Entrante dia 1 di september 2017 Minister Arthur Dowers a funda Migracion Aruba oficialmente, cu Gerald Vingal na cabes. E departamento aki ta atende tur asunto di migracion na aeropuerto y wafnan.
A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a incluie den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion.
Aunke cu e intencion inicial tabata pa dia 1 di januari 2017 crea un solo instancia, Migracion Aruba cu dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa, toch no a logra keda cla.
Migracion Aruba ta consisti di mas o menos 60 empleado.
