Desde dialuna, dia 27 di maart, Departamento di Obra Publico (DOW) lo a cuminsa cu e trabao di construccion na Palm Beach.
Esaki tin di haber cu e mehoracion di drenahe dilanti di CITGO Palm Beach y tambe renoba e asfalt for di e mesun luga aki, te cu Botica Santa Anna.
Aki, durante e prome fase di e trabao, a desvia trafico n’e crusada di New Wei Taai y despues sali bek riba e caminda principal di Palm Beach n’e T-weg dilanti di Sole Mare y vice versa p’e trafico contrario.
Segun e comunicado manda p’e entidad aki, e area lo ta cera pa trafico 24/7 pa 30 dia di trabao.
Nos ta den luna di mei y ainda e prome fase no ta cla. Caminda ta constantemente cera y no tin pasada p’e negoshinan cu ta situa den e area aki. Pa por yega n’e stacion di gasolin mes, tin di pasa parti patras, y via un caminda traha p’e proposito aki, cu un muraya basha abao, e usuarionan di e stacion di gasolin y e demas restaurantnan cu tin den vecindario, por mobilisa.
Mike van der Werk, propietario di Cafe Restaurant Bingo ta un di e comerciantenan cu ta sufriendo di e problema aki.
E ta conta cu nan tabatin un reunion cu DOW na final di maart y p’e prome tres dianan nada no a pasa. E no sa kico nan a haci, pero finalmente a coba un buraco y esey tabata seis siman pasa. Pero den e ultimo tres simannan nada mas no a pasa.
E no sa cuanto esaki lo dura. Mientras cu e rotonde a dura 7 luna pa traha riba dje y prome cu esey e luznan di trafico a dura dos aña pa percura pa nan.
E otro negoshinan den vecindario tambe ta sufri di esaki. Pa Van der Werk, e caminda aki ta uno sumamente importante. Antes e tabata E caminda di Palm Beach, unda cu tin diferente tienda, stacion di gasolin y varios apartamento, cu ta sufri sumamente hopi di dje.
TA TRES RESTAURANT
Fernando Dirsken, vocero di Aruba Food & Beverage Association, a comenta cu ta trata di n situacion basta alarmante p’e tres restaurant cu tin eynan cual ta Bingo, Elmas y Linda’s Pancake, cu nan tin e problema cu a cera e caminda.
E problema no t’e caminda, ya cu nan ta contanto cu nan ta drechando e caminda. E problema ta cu dia prome di april a cera caminda y tin tres siman cu no ta trahando riba e caminda y no tin ningun progreso.
Esaki ta haci cu nan ta hayando problema cu nan restaurant. Pa yega n’e restaurant hopi dificil y e clientenan no ta haci esfuerso pa yega e restaurantnan.
Aki nan ta perdiendo benta tur dia cu e caminda aki ta cera. Dirksen a indica cu algun dia pasa, e no por a mira movecion y ta basta keto. Ta lamentabel p’e restaurantnan cu ta traha asina duro pa yega na nan pan di cada dia y aworaki no ta haya hende pa bin n’e restaurant.
Tin biaha nan ta hende cu ta haci reservacion, pero door cu nan no por yega e hendenan no ta yega mas pasobra nan no sa unda pa pasa y ta opta pa bay otro caminda y no ta yega na e restaurant.
