Durante tratamento di e caso den corte pa ontneming, Paul Croes, a haya chens pa hiba palabra. Y na e ocasion ey a extende un invitacion na e huesnan di hof. “Bishita KIA pa boso mira cu boso mesun wowonan e situacion”.
Diahuebs merdia e ex-minister tabata den sala di corte unda cu hof a trata e caso di ontneming (di propiedad) cu Ministerio Publico tin contra dje. Den prome instancia corte a bay di acuerdo pa e paga un suma di 183 mil florin, pero e no tabata di acuerdo cu esaki y apela.
E biaha aki el a presenta cu un otro abogado, mr. Desiree Croes.
Mester bisa cu despues di mas cu un luna cu e sala principal di corte no tabatin airco y mester a uza un fan, diahuebs esaki tabata basta friu. Croes, bisti cu un t-shirt manga cortico, tabata tembla di friu dado momento. Croes a manera bira un miembro di Cuerpo Especial Arubano pa casi 45 minuut, ya cu nan mester a prest’e un jacket di e departamento aki pa tapa di e friu.
Den su ultimo palabra tambe Croes a hala atencion. El a bisa e tres huesnan cu KIA no ta cosnan di mira. E tralinan mes ta putri, corda e celnan paden, cu no ta cos di mira. “Mi bida tur dia ta come rondona di entre 50 pa 60 pushi, den un luga vies, cu ta den cay den otro. E no ta “““““““““““`humano,” el a bisa hues.
“Mi ta invita boso bishita e luga. Gobernador tabata e siman aki eynan y mi no sa si el a mira e situacion. Pero boso por mira cu boso mesun wowonan e situacion,” el a conta.
Na mesun momento el a papia di tempo cu e tabata deteni, unda cu el a pasa den un situacion hopi inhumano. A pasa 86 dia den isolacion, den un cel cu no ta apto pa hende normal y sano. E tabata un cel pa hende cu problema mental. “Eyden nan a cera mi pa mas cu 80 dia. Sr. Hues, bo por imagina bo mes 22 ora pa dia sinta of drumi, sin por haci nada, pero nada. Ni buki, ni Bijbel ni nada pa lesa ni niun hende pa bo papia cu ne. Por a bay lucht solamente dos ora pa dia. E resto di e 24 oranan ta cera den e cel sin por haci nada pero nada.”
Dado momento Hues a puntr’e “kico tabata e mas fastioso pa bo den e situacion ey”. Y su contesta mesora tabata “di no por haci nada, tabata e pio cos di ta cera di e forma ey, un luga cu no ta pa hende sano.”
El a bisa hues dado momento “Mi no sa si bo ta kere den Bijbel, pero ami si. Aden Bijbel ta papia di shete aña malo, y eseynan mi ta cumpli dia 28 di maart awo, cu ta e fecha riba cual tur cos a cuminsa. Y despues mi ta kere ta cuminsa shete bon aña pa mi. E tabata añanan dificil y duro, pa mi famia, pero miho tempo ta na caminda.”
E momento ey hues a puntr’e cuanto tempo mas e tin pa bay, y su contesta tabata ocho (8) luna.
Dia 2 di mei awo, den oranan di merdia hof lo anuncia decision den su caso y a bisa cu lo tuma seis siman pa studia e caso bon.
