Tres hues cu a bini for di Corsou a atende e “ontnemings’zaak” contra ex-politico Paul Croes. E ta sintando un castigo di tres aña caba pa e seis delitonan pa cual a hay’e culpabel. Sinembargo despues di e parti ey a bini e caso cu Ministerio Publico a cuminsa contra dje pa paga placa cu el a haya di un forma ilegal. Algo cu e ta desmenti.
Durante mas o menos un ora su abogado mr. Desiree Croes a papia di e motibonan pakico nan a bay den apelacion. E suma ta demasiado halto, si mira cuanto placa di esaki ta procedente di bentanan di head-piece, cuminda y tambe di benta di puppies cu nan a raza. Banda di esaki, e abogado a haci un apelacion pa tene cuenta cuanto a tarda pa e caso aki a bini dilanti, y e echo cu practicamente den media a cond’e for di prome instante caba cu tur e atencion cu el a haya.
Pa tur esakinan cu e abogado a trece dilanti, por bisa cu na final loke por keda pa e paga no ta mas cu 40 mil florin. Pero hasta esaki e abogado a pidi pa exonere di paga pa motibo cu na momento cu e sali di prizon, e no tin forma di paga, mirando tur e gastonan, entre pa defende den corte, cu el a acumula.
Mr. Desiree Croes a bisa cu tin masha hopi motibo pakico no por sigui castiga su cliente Paul Croes. El a menciona e tempo cu a cer’e den isolacion, cu ta inhumano. Tin regla di derecho humano di Nacionnan Uni cu ta menciona cu e maximo di tempo cu por hinca un hende den isolacion, den un caso manera esun di Paul, ta 15 dia. Den e caso aki el a bay 71 dia di mas.
A tarda masha hopi mes pa trece e caso di ontneming dilanti, pa cual defensa ta kere cu esaki no ta ni valido mas.
Pero tambe a menciona cu a “over expose” su cliente den media, prome cu su condena. Si caso Avestruz ora cu Google esaki ta haya 13.800 geklik riba item mientras cu den e caso di su cliente, esaki ta pasa 3.8 miyon, cu ta hopi pa un isla chikito manera Aruba. No solamente esey, hasta ora di tratamento di e caso a habri porta di Piedra Plat Entertainment Center pa publico sigui e caso riba en total 9 pantaya grandi cu a pone disponibel.
“Mi cliente a haya castigo tras di castigo, ademas di e castigonan di corte cu tambe ta mas cu un.” El a menciona e tempo den isolacion, sin por mira ni su yiunan chikito, el a perde su trabou, a kita su derecho di ta ambtenaar, di ocupa funcion publico, etc. Mas e castigo di prizon di tres aña y awo e pago cu nan kier pa e haci di 183 mil florin.
E abogado a bisa e tardansa ta haci cu, ley ta bisa, ta reduci 10 mil di euro; mester kita e placa cu nan a haya di ganashi di bende di headpiece, cuminda, puppies, etc. Pues e ta kere cu tur e suma cu ta bisa no por hustifica, si por wordo splica.
Procurador General mes no a bisa mucho cos y a pidi pa ratifica e decision di Corte di Prome Instancia riba e tema aki.
Loke cu a hala atencion tabata cu na final Hof a dicidi cu lo tuma seis siman, mas cu normal, pa anuncia su decision riba e peticion di drs. Paul Croes. E decision lo ta dia 2 di mei awo.
