E ta para skirbi den Mateo capitulo 13: 24- 43 y ningun hende no por cambie: E reino di cielo por wordo compara cu un sembrado, cu a sembra bon simia den su cunucu. Ma mientras hende tabata,drumi . Su enemigo a bini y a sembra yerba shimaron den e trigo y a coy su caminda bay.
Y ora e trigo a spreit y a forma tapushi, e yerba shimaron tambe a keda bisto.
E ora ey e esclavo di e doño di cunucu a bin bis’e Señor no ta bon simia bo a sembra den bo cunucu, dicon anto tin yerba shimaron aden. Y e a a bisa nan ta un enemigo a haci esaki.
Nan a bis’e bo kier pa nos bay recoge nan. Ma e a contesta no, pa no sosode cu mientras boso ta recoge e yerba shimaron, boso ranca e trigo tambe hunto cu ne. Laga nan dos crece hunto te na cosecha y na tempo di cosecha lo mi manda e cosechadonan recoge e yerba shimaron prome, y mara nan na boshi pa kima nan, ma recoge e trigo warda den mi mangasina.
Mateo 13 :37 ta splica bon cla pa tur hende compronde: Esun cu ta sembra e simia ta e Yiu di Hende y e cunucu ta e mundo, e bon simia ta e yiunan di reino, y e yerba shinaron ta e yiunan di e malvado, e enemigo cu a sembra nan ta e diabel.y e cosecha ta e fin di mundo y e cosechado ta angelnan.
Awor tur hende kier sa con e enemigo ta sembra den hende?
Awel esey ta sosode a base di locual hende mes scoge pa nan bida, si bo scoge pa inmoralidad y abominacion, malicia y pica bo ta conta como yerba shimaron.
Si bo scoge pa salbacion, humildad, bondad, respet y santidad na Dios bo ta wordo conta como maishi. Tene bon na cuenta cu bo no por biba memey di nan dos.
No a sobra mas tempo pa tolera maldad, ni tampoco hipocresia, tampoco inmoralidad cu kier domina mundo, pasobra aunke e leynan por ta cambia rond mundo pa inclui inmoralidad, Dios den un momento of otro lo trece un separacion doloroso.
E palabra di Dios ta bisa cu dos lo ta riba un cama, un ta bay y otro ta keda.
Influencia diabolico ta hopi grandi, den locual ta materialismo, inhusticia y inmoralidad, manera ta para skirbi den 1 Corintionan 6:9-10. P’esey Dios ta duna oportunidad pa arepenti awor cu tin tempo.
Pero tambe nos por bolbe mir’e den Galationan 5:19-21 y tambe nos siña cosnan grandi ora nos lesa Galationan 6:7-8. Un hende no tin mester di tin rango di universidad pa e compronde locual Dios ta avisa.
Nos ta bibando den un tempo di claridad spiritual pa tur esunnan cu kier mira y scucha e cosnan grandi cu Dios ta haciendo, pasobra e tempo di cosecha di Dios ta cerca, p’esey esun cu ta den cosnan malo cada dia lo busca mas maldad pa implementa, pero esun cu ta den cosnan bon,cada dia e mester busca tur manera pa hala cerca Dios y permanece riba e caminda di Dios.
Hende ta gaña nan mes, nan kier gaña otro, nan kier tapa solo cu un dede, rechasando e gran berdad di Dios, rechasando e Yiu di Dios, y rechasando e boluntad y principionan di Dios.
Y tur esunnan cu ta sigui tras di mentira di diabel lo trompica, pasobra nan no a acepta e plan di Salbacion di Dios.
Sinceramente,
Pastoor Marcel Balootje.
