Ambos ta hoben den politica, ambos cu hopi ambicion y cu un sin fin di oportunidad di crece. Ambos a yega top na edad hoben, pero ambos a haya nan cu castigo di prizon apenas den crecemento di nan carera politico. Ta referi na Paul Croes di Aruba y Gerrit Schotte di Corsou. E diferencia: Schotte a haya 3 aña di prizon mientras Paul Croes a haya 4 aña di prizon awe pa mesun acusacion di corupcion.
Gerrit Schotte tabata e prome Minister Presidente di pais Corsou. E ta e Minister Presidente mas hoben den henter Reino Hulandes. Pero a condene na maart 2016 na 3 aña di prizon, precies loke Fiscal a pidi. Pa 5 aña largo e no por participa na eleccionnan politico mas na Corsou.
Tambe a condene despues na augustus 2018 den un “ontnemingszaak” pa paga bek Naf. 1.844.190,= di placa cu el a haya contra ley. Si e no paga bek e mester bay cera.
Paul Croes tabata e Presidente di Parlamento mas hoben di nos pais. Awe el a tende di Hues cu di e castigo di 5 aña cu Fiscal a pidi pe, cu ta conden’e na 4 aña di prizon, kitando e dianan cu el a pasa encarcela caba. Mas ainda ta prohibi’e pa 9 aña largo di traha como Empleado Publico den Gobierno of pa participa den eleccionnan politico na Aruba.
Durante tratanento di e caso di Paul Croes, ora a yega momento di pidi castigo, Fiscal a menciona e caso di Gerrit Schotte como ehempel pero a bisa mesora cu e caso IBIS di Paul Croes ta hopi mas grandi, cu mas sospechoso, mas permiso otorga inhustamente y mas placa envolvi. E castigo como tal el a pidi na 5 aña tambe, cu ta casi dobel di esun di Schotte mientras cu e añanan pa keda for di politica tambe ta casi dobel compara cu Gerrit Schotte.
Mester menciona cu Gerrit Schotte a yega final di su opcionnan pasobra despues di e condena na maart 2016, el a apela y sigui bataya te na Hoge Raad na Hulanda. Sinembargo na november 2018 el a perde e caso ey tambe di cual Corte a ratifica e decision di Corte di Apelacion cu de facto a ratifica e mesun decision di Corte den Prome Instancia.
Den caso di Paul Croes, el a menciona awe di lo apela e sentencia den Corte di Apelacion di Caribe Hulandes. E proceso ey por dura algun luna di tratamento. Si e no keda contento eynan, ainda e lo por bay Corte di Casacion na Hulanda. Ta ora esey duna ultimo palabra cu Ministerio Publico por ehecuta e sentencia.
