Aruba Tourism Authority (A.T.A.) tambe tabata presente n’e conferencia di Global Sea Trade. N’e conferencia aki A.T.A. a tuma e oportunidad pa topa cu diferente linea crucero y otro partido.
Patrick Melchiors, Destination Service Manager di A.T.A., a splica cu nan tabata presente n’e conferencia mundial, esun mas grandi den e mundo di crucero. A.T.A. hunto cu Aruba Ports Authority (A.P.A.) ta representa Aruba como destinacion. Aki a presenta nan mes cu tur linea crucero, tur otro partido cu a reuni cu ne. Hunto cu e booth di ABC (Aruba, Boneiro y Corsou) por mira e poder cu e tres islanan tin den mundo crucero como hub pa hende yega.
Aruba tin hopi demanda cu e lineanan crucero mes ta bisa cu hende ta pidi pa e isla ta rib’e iterinario. Ta hopi importante cu tin alternativa, sea Corsou of Boneiro. Esaki ta debi cu e trip ta largo. A.T.A. hunto cu A.P.A. nan ta sinta den casi tur reunion pa por representa Aruba y fortalece e relacionnan cu tur linea crucero.
Boga pa ‘high value, low impact’
Un cos cu por a scucha hopi bes, di cual A.T.A. y Ministerio di Turismo a trece dilanti ta menos cantidad di hende pero cu tin un impacto mas grandi. E lineanan crucero ta bin cu miles di hende, y e pregunta ta con ta trece un balans. Riba esaki el a splica cu esey ta modelo di turismo ‘high value, low impact’ cu nan ta boga p’e. Semper ora di mira barco crucero grandi yega ta algo waw. Pero esaki ta un punto cu cada bes nan ta discuti y e lineanan crucero tambe.
Melchiors a splica cu conhuntamente cu e partnernan a bay mira na esunnan mas chikito, mira si por spread the wealth y no laga tur cos bin den e temporada halto (high season) cu ta entre october y april. Tambe A.T.A. a pidi si tin e posibilidad p’e cruceronan bin despues, esta entre mei y september. Asina ey ta haya un extension den henter aña y tin un balans un tiki mas miho. Esey ta algo cu semper ta boga p’e, ta pusha p’e.
Book adelanta
E ta kere cu tin oido n’e lineanan crucero. Pero semper e reto ta cu e lineanan crucero ta book dos aña. Di eynan mester mira con por sigura di haya e linea crucero cu ta bisa y compromete di bin den temporada di zomer of desde awo. Tin ta planeando 2025 of 2026 caba. Tin di e lineanan crucero cu a compromete caba pa mira y extende un tiki mas. E lineanan crucero mes ta mira cu e high season ta yen y esaki no ta solamente na Aruba so, pero en general.
Proyecto cu A.P.A.
A.T.A. ta trahando cu A.P.A riba e proyecto di crea un visitor insperation center dilanti di Welcome Plaza. Esaki no ta solamente p’e turistanan di crucero, pero tur hende por yega eynan. E ta inspira pa mira un Aruba, por ta e hidden gems cu hasta e hendenan local no sa di dje.
Melchiors a expresa cu asina ey ta inspira nan bek pa bin bek si ta riba un crucero of como stayover guest. Actualmente ta den e desaroyo con pa bay haci e decoracion interior, kico lo ta e experencianan. Aworaki nan ta na un parti hopi inicial.
