Abogado mr. Patrick Brown ta un miyonario…por lo menos pa un dia. Awe el a cobra e premio grandi di Lotto pa Deporte, den nomber di un cliente. Como cu Lotto di Aruba ta exigi pa saca potret di e ganado, ultimamente ganadonan ta opta pa paga un abogado pa cobra e premio den nan nomber. Awe e abogado di bufete Brown Lawyers a cobra e bunita suma di un miyon ocho shen y binticinco mil florin (Afl. 1.825.000,-) cu lo subi nan cuenta di banco awe ainda. Mañan e abogado lo mester pas’e pa su cliente, cu ta balora su privacidad.
Diamars dia 12 di januari ultimo, den e sorteo number # 1315, a saca e numbernan ganado 03-27-28-29 y Mega Ball 11. Un solo persona a gana e premio grandi di 1.1 miyon mas e mega plus di 725 mil florin, pa yega na e premio total di Afl. 1.825.000,=. E hungado cu suerte aki a cumpra su Mini Mega Plus na Bo Skina di Suerte na Noord, cerca di e tienda di verf Sherwin Williams.
Ta despues di por lo menos dos aña cu e premio a crece bira 1.8 miyon florin. Tanto na aña 2019 y 2020 e premio no a crece dje tanto ey. Mester menciona cu e districto di Noord mes ta conoci pa tin hopi suerte y por lo menos na aña 2018, mayoria premio miyonario a cay den Noord.
Districto di Noord tin hopi suerte
Na inicio di aña 2018 a bende Lotto miyonario na Montaña y despues un otro premio miyonario na Palm Beach. E ultimo premio miyonario a cay na Sasakiweg / Cunucu Abou.
Lotto haciendo hopi famia miyonario
Lotto di Aruba a conoce un benta di mas cu 41 miyon florin na aña 2013. A nota un aumento barbaro na 2014 alcansando mas di 49 miyon florin. Na aña 2015 e benta a cay un poco na 48 miyon, a cay na 2016 na 47 miyon, pero a bons bek duro na 2017 ora cu a alcansa e suma di Afl. 50.478.681,= na benta total, cu ta representa un crecemento di 6.6% compara cu e aña anterior.
Tin mas di 180 rebendedo di Lotto di Aruba, situa tur rond di nos isla. Lotto anualmente ta paga mas o menos 5 miyon florin na comision na rebendedonan, pues ta mira den cada un di nan un bon partner di negoshi. Separa di e mas di 110 miyon florin paga na premio e ultimo 5 añanan, Lotto ta paga comision na rebendedonan y sin lubida BBO na Servicio di Impuesto. Tur esaki ta afecta nos economia den forma positivo.
Lotto di Aruba
Lotto, e loteria di Aruba tin diferente wega manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa y Gana.
Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
