Atrabes di e radio emisora nobo, Radio Aruba 91.5 FM, por a sigui e programa Den Profunidad, cu ta wordo presenta pa Ezequiel Anthony, unda cu pastoor Marco Berlis a enfoca e problematica di KIA.
Pastoor Marco Berlis a comenta cu tin asina hopi cos cu ta andando na Aruba. Apesar cu nos por wak cosnan cu ta malo, si tin speransa y semper tin speransa. Importante ta vocifera e problema, manera cu a bin ta pasa den sociedad, pa asina trece solucionnan pa por sigui continua cu un miho Aruba.
Pastoor Berlis tin un inkietud pa loke ta KIA. E nomber ta bisa Korrectie Instituut Aruba, un instituto cu ta suppose di trece coreccion na esnan cu ta drenta den e luga aki pa diferente motibo. Berlis a sinta studia nos sistema di prizon pa hopi tempo. El a tuma nota di e sistemanan di prizon na Latino America cu ta inhumano. Si nos mira Merca, nan no ta logrando nan obhetivo, como un Korrectie Instituut. Si nos mira Europa, nan sistema coreccional ta hopi mas avansa riba esnan cu ta drenta e luganan aki.
Un di e percepcionnan eroneo cu nos tin tocante e sistema di prizon ta, cu ora un hende ta kibra ley, hopi hende, tin odio y rabia y kier castiga e persona. Mester tin consecuencia. No ta algo cu a wordo imponi riba bo, bo mes a busk’e. Esey no ta den duda. Pero loke mester si, ta haci un miho trabao den e sistema di reeduca y coregi. Ora cu papia di nos yiunan, nos ta coregi nan, nos ta haci’e pasobra nos ta stima nan. Si no coregi nan, e por trece problema pa nan mes.
Pastoor Berlis a elabora amplio riba e tema aki durante su entrevista den e programa Den Profundidad, cual por mira e transmision completo riba e pagina di Facebook di Radio Aruba 915FM. Tur mainta na Radio Aruba 91.5 FM, for di 10’or di mainta pa 12or di merdia, e emisora cu awor tin un imagen nobo y tambe programacion nobo, por sigui e programa aki, Den Profundidad, cu topiconan hopi interesante. Awe, diahuebs, ta bay tin como invitado sra. Nadia Chaljub. Diabierna, Den Profundidad ta presenta e status di Boneiro cu e invitado James Finnies.
