Salbacion ta un decision personal cu tur hende mester tuma, pasobra e palabra di Dios ta bisa:
Cu esun cu kere lo ta salba, pero esun cu no kere ta condena caba, pasobra e no a kere den e Yiu Unigenito di Dios (Juan 3:16-18).
Mescos cu e palabra ta bisa den Filipensenan 2:10-11: Cu pa e nomber di Hesus, tur rudia mester dobla ,di esunnan cu ta den shelo y riba tera, y bao di tera. Y cu tur lenga mester confesa cu Hesus Cristo ta Señor pa Gloria di Dios Tata.
No ta bay asunto di cu hende kier of no kier, pero si e decision aki no wordo tuma, nos lo no drenta shelo, nos lo biba un bida sin ningun clase di speransa cu na final ta termina den perdicion.
Dios a splica esaki hopi cla den Juan 3:36 bisando: Esun cu kere den e Yiu tin bida eterno, ma esun cu no obedece e Yiu, lo no mira bida, ma e furia di Dios ta keda riba dje.
Hesus a bisa den Juan 8:12: Ami ta e luz di mundo, esun cu sigui Mi lo no cana den scuridad, ma lo tin e luz di bida. Hesus a bolbe bisa den Juan 14:6: Ami ta e caminda y e berdad y e bida, ni un hende por yega cerca e Tata, sino pa medio di Mi.
E ta bon pa pone na tur hende su conocemento cu cada persona individualmente mester kere den nan curason y confesa cu nan boca cu Hesus Cristo ta Señor y cu Dios a lant’E for di morto y lo bo ta salba. Pasobra cu curason hende ta kere pa haya husticia y cu boca e ta confesa pa haya salbacion (Romanonan 10:9-10).
P’esey no laga ningun hende kere cu e por haya salbacion pa via di otro hende.
No laga ningun hoben kere cu pasobra nan mama of tata ta Cristian y ta biba pa Señor, esey ta nifica cu e por sigui biba bida di bandido, haciendo maldad y toch drenta shelo. Como hoben bo mes mester tuma e decision personal di entrega bo bida na Señor y biba pa Señor.
Tampoco no laga ningun hende kere cu door cu mi casa ta sirbi Dios y ta biba pa Dios, ami por sigui parandia, bebe scondi, cana den inmoralidad, y pa motibo di mi casa lo mi drenta shelo. No esey lo no ta posibel, ta bo mes como persona mester entrega bo bida.
Wak bon kico ta para skirbi den Mateo 24;40:41 y sa cu dos hende por biba hunto pero ora cu Señor bini uno ta bay y e otro ta keda, no ta importa cu nan ta casa, pasobra salbacion ta individual y Dios ta esun cu conoce tur curason. Aunke Lot su deseo tabata pa su casa bay cu ne, toch e casa no a alcansa, pasobra su curason tabata pega na cos di mundo.
P’esey henter nos famia mester ta salba y bibando pa Dios, pa ora Cristo Hesus bini nos tur por subi hunto.
Corda bon cu ningun hende no por salba ningun hende, e misa, tempel, salon, y iglesia cu bo ta bay no por salba bo, bo pastoor, dominee, obispo, apostel no por salba bo (Efesionan 2:8-9), pasobra no tin otro nomber den cual hende por ricibi salbacion cu no ta den e nomber di Cristo Hesus (Hechonan 4:10-12).
E tempo ta cerca, e binida di Cristo Hesus ta cerca, nos tur ta mirando e avance di maldad, y esey ta nifica cu Señor ta bin busca su pueblo.
