Jennifer Arends-Reyes, parlamentario (AVP), a destaca cu e presupuesto supletorio ta inclui accionan cu ta duna sosten na pensionadonan, yuda alivia e costo di bida y amplia e posibilidad pa vivienda y transporte publico. Segun Arends-Reyes, e balor di e cambionan aki ta depende di con nan yega na e hende y e comunidad cu tin necesidad.
“Pa nos, e pregunta principal ta: kico e cambio aki ta nifica pa e hende na cas, pa e trahado, pa e pensionado, pa e negoshi y pa e comunidad? Un presupuesto ta importante ora e recurso publico ta yega na resultado concreto den bida diario di nos pueblo”, Arends-Reyes a bisa.
Un di e accionan cu por yuda famianan y negoshinan ta e ahuste di Afl. 5 miyon relaciona cu e prijs halto di gasolin. Arends-Reyes a señala cu costo di combustibel ta afecta transporte y por aumenta prijs di producto y servicio. E ta pidi gobierno splica con e sosten lo yega na esnan cu ta sinti e presion mas fuerte, y con lo evalua su efecto. Tambe e kier sa si WEB ta contempla medida di cobertura financiero, conoci como “hedging”, pa limita e impacto di cambionan den prijs di combustibel.
Pensionadonan y hende cu ta depende di AOV of AWW tambe por beneficia di e medidanan. E reparatietoeslag ta subi cu Afl. 150 pa luna pa aproximadamente 21.000 beneficiario. Ademas, e prima riba e prome Afl. 30.000 di entrada di pensionadonan ta baha di 5% pa 0%. Arends-Reyes a pidi pa gobierno aclara si e reduccion ta aplica tambe pa pensionadonan cu ta sigui traha, cua tipo di entrada ta cubri y con hende por haya e beneficio.
Vivienda accesibel ta otro prioridad. E presupuesto ta propone un prestamo di te Afl. 23 miyon pa FCCA, na un interes di 2%, pa construccion di cas di huur social pa hende di 55 aña y mas. Arends-Reyes a enfatiza cu e proyecto por duna mas hende mayor acceso na un cas adecua y sigur. E ta pidi informacion tocante e cantidad di cas, e fecha di inicio y e criterio pa determina ken ta cualifica.
Pa San Nicolas, e propuesta ta inclui te Afl. 2.943.800 pa renobacion y mehoracion di busstation. Un espacio limpi, accesibel y sigur por beneficia pasaheronan y contribui na e actividad di e centro di San Nicolas. Arends-Reyes a pidi pa gobierno splica e plan pa e trabounan, mantenemento y acceso, incluyendo si lo tin espacio pa e farmers market.
E aumento di Afl. 300.000 pa DOW ta destina pa ahusta compensacion di ekipo di contratista. Arends-Reyes a señala cu e ekiponan aki ta yuda cu mantenemento di caminda y espacio publico, trabou cu ta toca siguridad y calidad di bida den barionan. E ta spera cu e aumento lo sosten e capacidad di DOW pa atende e trabounan necesario y a pidi pa informa parlamento con e recurso lo traduci den servicio pa comunidad.
E propuesta ta inclui tambe dispensacion di reclamacionnan civil di te Afl. 73.865 pa cliente di Trampolin pa Trabao, relaciona cu beneficio di discapacidad ricibi. Arends-Reyes a indica cu e medida por duna alivio na persona den situacion vulnerabel y a pidi p’e proceso ta comunica claramente.
Arends-Reyes a reconoce cu e surplus proyecta di Pais Aruba ta Afl. 80,8 miyon. E ta enfatisa cu disciplina financiero ta importante pa e sosten y e inversionnan por sigui beneficia Aruba.
“E ahustenan aki toca necesidadnan real: gasto diario, entrada di pensionado, vivienda, transporte y mantenemento di nos espacio publico. Nos kier mira cu cada inversion ta yega na e hende cu tin mester di dje y cu pueblo por sigui e progreso. Asina e presupuesto supletorio por traduci den beneficio concreto pa nos comunidad”, Arends-Reyes a conclui.
