Durante un audiencia publico cu a tuma luga diabierna mainta, tres hues a trata y rechasa e peticion di wraking presenta pa Chania Fernandes Pedra contra e hues penal cu ta atende e caso di e accidente fatal di principio di januari, den cual dos persona a perde nan bida.
Fernandes-Pedra a presenta e peticion pasobra, segun su posicion, e no ta haya un tratamento imparcial durante e proceso penal. E audiencia di wraking a tuma luga despues cu e peticion a wordo entrega diaranson 4 di november.
Durante e audiencia, abogado Jairon Odor a presenta e argumentonan na nomber di Fernandes-Pedra. Odor tabata representa su cliente exclusivamente durante e procedura di wraking. E abogado a indica cu el a haya apenas un dia pa prepara e argumentonan, despues cu el a ricibi un yamada durante oranan di anochi.
Entre e puntonan presenta tabatin desacuerdo cu peticionnan pa haci investigacion adicional den e caso, asina tambe preocupacion relaciona cu e acceso na un abogado y na e dossier penal.
Despues di scucha e argumentonan, e tres huesnan a retira pa delibera. Aproximadamente 10 minuut despues, nan a bolbe den sala y a comunica nan decision. E decision oficial lo wordo poni por escrito.
Corte a rechasa e peticion pa haci investigacion adicional, indicando cu e tipo di peticion aki mester wordo presenta durante e tratamento di e caso penal y no durante e procedura di wraking. Segun e huesnan, e tres huesnan cu tabata trata e peticion di wraking no tabata e instancia encarga pa tuma decision riba e solicitud di investigacion adicional den e procedura aki.
Tambe e argumento relaciona cu falta di abogado y acceso na e dossier penal a wordo rechasa. E huesnan a splica cu, aunke un acusado tin derecho na asistencia di un abogado y acceso na e dossier, e puntonan aki mester a wordo inclui den e peticion di wraking original, entrega dia 4 di november. Sinembargo, esey no a sosode.
Ademas, e corte a indica cu ora un persona considera cu tin un motibo pa cuestiona imparcialidad di un hues, e peticion di wraking mester wordo presenta na momento cu e situacion surgi. No ta e intencion pa acumula diferente incidente durante un periodo largo y despues presenta nan hunto den un peticion.
Basando su decision riba e motibonan menciona, corte a rechasa e peticion di wraking. Como consecuencia, e tratamento di e caso penal contra dje lo sigui dia 18 di november.
