Ta dificil pa corigi un mucha ora e no ta mira ordo den bida di su mayor. Bida di un mayor mester ta un ehempel bibo di ordo, decencia, disciplina, y amor pa nan yiu.
Materialismo ta domina bida di hopi mayor. Paranda no ta keda afo, ora placa caba, hopi mayor ta haya malbeis y e muchanan ta bira e victima pasobra e mayor no por controla su mes. ( 1 Timoteo 5 vers 8)
Ora bo ta un mayor bo mes mester ta e ‘role model’ pa bo yiu, abo ta e prome mentor pa su bida, si algo no ta bayendo bon, abo mester drech’e pa asina bo yiu por miramcu ora un persona comete un eror, e mester tin boluntad pa drecha esaki. (1 Cronicas 28:9)
No ta existi mayor perfecto, pero cu yudansa di Dios, bo por alcansa e meta pa bo famia.
Nos muchanan awendia ta wak tur cos, y ta dificil sconde nos bida for di nan bista. Esey ta nifica, laga nos como mayor biba mas habri posibel, pa asina nos yiunan mira cu no tin nada di sconde pasobra mayoria biaha ora tin cos di sconde, ta algo cu no ta bon.
Hopi hende no ta compronde e trauma cu un mucha por haya ora ta existi infieldad entre su mayornan. Hopi biaha mucha por sinti ora infieldad drenta cas y relacion matrimonial ta na peliger.
Ora mucha ta rebelde, e mayornan ta bisa cu nan no a cria yiu rebelde, pero esey no ta berdad, pasobra ta nan actitud ta haci e mucha rebelde, pasobra locual un mucha ta mira y tende tur dia na su cas ta influencia su comportacion.
Tin demasiado mucha yen di rabia ta cana rond y hopi biaha ta e mayor ta e causante, pasobra e no ta lanta su yiu den e caminda di Dios y e mucha no conoce e palabra pordon, tampoco despensa, coreccion y discplina ta laga hopi di desea. (Mateo 19:13-14).
Tur hende grandi sa di kico nos ta papiando, y e situacion aki a yega demasiado leu, pasobra tin mayor ta perhudica nan yiu enbes di apoya nan yiu. Violencia domestico tambe ta pone salud mental di mucha na peliger.
Dios a duna cada mayor e encargo sagrado di lanta nan yiu den e boluntad di Dios. ( Salmo 78 vers 4)
Efesios Capitulo 6 vers 4 ta bisa: Y boso tatanan (mayornan) no provoca boso yiunan na rabia, ma lanta nan den e disciplina y instruccion di Señor.
Mayor ta tempo pa bo realisa cu bo lucha no ta contra carni y sanger, pero contra principado di scuridad ( Efesios 6:12), y cu e sistema di mundo ( 2 Timoteo capitulo 3 vers 1-9) ta purba tur manera pa domina e hubentud y saca nan for di e proposito di Dios. Nos deber como mayor ta pa para firme banda di nos yiunan , pa curasha nan cu Palabra di Dios, Fe, Amor y Perserverancia, y asina glorifica nos Tata cu ta den shelo.
