Ora nos studia mas profundo nos ta haya sa cu hipo ta nifica rebaha, y crecia ta nifica sin cara. Awel hipocresia ta nifica un hende sin cara. Anto den famia no por tin hipocresia, pasobra esey ta nifica cu un hende ta trata miho cu e otro, pasobra tras di hipocresia ta sconde discriminacion y rechaso. Y tambe den ningun organisacion hipocresia no ta bon bini.
Pero kico e Palabra di Dios ta bisa di Hipocresia?
Den Romano Capitulo 12:9 Señor ta bisa: “Laga amor ta sin hipocresia, aborece loke ta malo y tene firme na locual ta bon , stima otro cu amor fraternal , duna preferencia na otro den honor, no flakia den diligencia, mas sea ferviente den Spirito, sirbiendo Señor.”
Di e forma aki nos kier contribui pa evita cu tin menos violencia domestico, menos hende ta bandona cas, menos mucha herida, menos consumo di alcohol, menos droga, pasobra manera nos a bisa hopi biaha, crisis social no ta solamente placa y falta di trabao, pero e ta depende hopi na e manera cu nos ta trata otro como ser humano.
Proverbio 11:13 ta bisa: Esun cu ta desprecia su prohimo ta falta huicio, mas un hende cu comprondemento ta keda keto.
Proverbio 11:14 ta bisa: Esun cu ta cana haci redo ta saca secreto , ma esun cu ta confia ta tapa e asunto.
Como famia nos ta yama pa biba un bida balansa riba e palabra di Dios y hopi biaha hipocresia ta stroba nos di bay dilanti, pasobra hopi biaha nos ta wak influencia di afo, mientras cu paden nos ta yen di hipocresia.
Ningun hende den pueblo no kier a deal cu Zaqueo, mescos ningun hende den pueblo kier a deal cu Saulo di Tarso, pero Dios den su misericordia a duna oportunidad na tur dos, pa nan bida ta drecha.
Proverbio 11:17 ta bisa: E hende misericordioso ta haci bon na su mes alma, ma e hende cruel ta tormenta su mes carni.
Un homber cu ta maltrata su esposa y yiunan ta maltrata su mes carni, un mucha cu no ta respeta su mayor ta maltrata su mes carni, un muhe cu ta gaña su esposo ta maltrata su mes carni.
Tin cos cu no ta sali na cla den asunto di ley, pasobra nan ta keda scondi, pero dilanti di Dios nada ta keda scondi, pasobra tur locual cu ta scondi e enemigo ta uza pa lant’e bek y asina sigui causa division den famia.
No ta boluntad di Dios pa nos trata otro cu dos cara, bo no por practica politica den e hogar cu Dios a duna bo, bo no por duna un yiu mas privilegio cu otro, ni tampoco trata bo esposa(o) cu dos cara.
Dios ta aborece tur locual tin dos cara, Dios ta aborece tur locual ta imitacion di su creacion berdadero, pasobra tur locual Dios a crea el a duna un curpa, y caminda tin hipocresia tin imitacion di locual ta berdadero.
Dios kier pa nos stima otro cu amor berdadero. Salmo 133.
